Европа Марказий банки (ECB) базавий ставкасини 75 пунктга кўтариб, йиллик 2 фоизга етказди. Бу ҳақда «Коммерсантъ» хабар бермоқда.
Ушбу қадам билан регулятор иккинчи марта кетма-кет ставкани оширди. Охирги марта ставка 8 сентябрда 75 пунктга оширилган эди.
ECB Бошқарув кенгаши қарор қабул қилди ва инфляцияни ўрта муддатли 2 фоизга ўз вақтида қайтаришни таъминлаш учун фоиз ставкаларининг янада оширилишини кутмоқда, — дейилади регулятор веб-сайтида.
Асосий фоиз ставкаси 2 фоизга етказилди, депозитлар бўйича ставка энди 1,50 фоизни, ECB’нинг қисқа муддатли кредитлари бўйича ставка эса 2,25 фоизни ташкил этади.
Регуляторнинг қайд этишича, инфляция жуда юқорилигича қолмоқда ва узоқ вақт давомида мақсадли кўрсаткичдан юқори бўлиб қолади. Сентябрь ойида евроҳудудда инфляция 9,9 фоизга етди.
Аввалроқ Ўзбекистонда асосий ставка яна 15 фоиз даражасида ўзгаришсиз қолдирилгани ҳақида хабар берилганди.
Изоҳ (0)