Кремль Путин қандай ҳолатда Байден билан музокара ўтказиши мумкинлигини маълум қилди

Россия президенти матбуот котиби Дмитрий Песков Владимир Путин ва Жо Байден ўртасида қандай ҳолатда музокаралар ўтказилиши мумкинлигини айтди. Унинг сўзларига кўра, бунинг учун АҚШ Россиянинг хавфсизлик кафолатлари ҳақидаги хавотирларига қулоқ тутиши ва «декабрь—январь пайтидаги ҳолатига қайтиши» керак.

«АҚШ бизнинг хавотирларимизни тинглашни истаса, яъни амалда декабрь—январь ойларидаги ҳолатига қайтиб, Россия нима таклиф қилишини сўрамоқчи бўлса, бу улар билан музокаралар столига ўтиришга арзийди. Мен Брюсселга ҳам, Вашингтонга ҳам тақдим этилган ҳужжатлар лойиҳаларини назарда тутяпман», — деди Песков «Москва. Кремль. Путин» эфирида.

Аввалорқ Индонезия Путин ва Байден ўртасида учрашув ташкиллаштиришга тайёрлигини билдирган эди.

15—16 ноябрь кунлари Индонезияда G20 саммити бўлиб ўтади. Июль ойи бошида Москва Жакартани Путиннинг учрашувда иштирок этиш нияти ҳақида хабардор қилгани маълум бўлди. Песковнинг сўзларига кўра, Путиннинг онлайн ёки офлайн иштирок этиши бўйича қарор «барча омиллар, жумладан, хавфсизлик омили»ни ҳисобга олган ҳолда қабул қилинади.

Аввал Байден G20 етакчиларининг навбатдаги йиғилишида Путин билан учрашишни истисно қилмаган эди. Россия ташқи ишлар вазири Сергей Лавров эса агар АҚШ томонидан таклиф киритилса, Кремль G20 саммитида Россия ва Америка президентларининг учрашиш имкониятини кўриб чиқишга тайёрлигини билдирди.

Кейинроқ Байден Индонезиядаги G20 саммитида Россия етакчиси Владимир Путин билан учрашишдан маъно йўқлигини айтди. Байденнинг сўзларига кўра, учрашув ҳақидаги қарор Путин нима ҳақида гаплашмоқчи эканлигига боғлиқ бўлади. Масалан, агар Путин наркотиклар контрабандасида айбланаётган баскетболчи Бритни Гринерни айирбошлашни муҳокама қилмоқчи бўлса, у суҳбатга рози бўлади.

Украина президенти Владимир Зеленский G7 мамлакатлари етакчиларининг онлайн учрашувида кескин нутқ сўзлаб, G7 давлатлари раҳбарларини Россиянинг амалдаги раҳбари билан ҳеч қандай мулоқот бўлиши мумкин эмаслиги борасидаги аниқ ҳақиқатни тан олишга чақирди, чунки Россия раҳбарининг ўзи Украинанинг йиллар давомида тинчлик музокараларини ўтказишга уринишларига қарамай, мулоқотни рад этган.