Шавкат Мирзиёев Сеулда юз берган фожиа оқибатида кўплаб инсонлар ҳалок бўлгани муносабати билан Жанубий Корея президенти Юн Сок Ёлга таъзия йўллади.
Президент матбуот котибининг маълум қилишича, давлат раҳбари қурбон бўлганларнинг оила аъзолари ва яқинларига ҳамдардлик билдирди, жароҳат олганлар тез фурсатда соғайиб кетишларини тилади.
29 октябрь куни Жанубий Корея пойтахти Сеул шаҳри марказида Хеллоуин байрамини нишонлаш вақтида юз берган тиқилинч сабаб одамлар юрак хуружига учраган эди. Кўчалар одамлар билан гавжум бўлган. Оломон ўтиб бораётганида тиқилинч юз берган.
Сўнгги маълумотларга кўра, воқеа оқибатида вафот этганлар сони 151 кишига етган, 82 киши жароҳатланган. Жабрланганлар орасида икки нафар Ўзбекистон фуқароси ҳам бор. Улардан бири вафот этган, иккинчиси жароҳат билан шифохонага ётқизилган. Аҳволи қониқарли деб баҳоланмоқда.
Жанубий Корея президенти Юн Сок Ёл Сеулдаги фожиа муносабати билан миллий мотам эълон қилди ҳамда қурбонлар ва қурбонларнинг оила аъзоларига ҳамдардлик билдирди.
Изоҳ (0)