Ўзбекистонда иссиқхона мажмуаларининг табиий газга бўлган эҳтиёжини қондириш учун қўшимча 500 млн куб табиий газ етказиб берилади. Бу ҳақда «Ҳудудгазтаъминот» матбуот хизмати хабар берди.
Қайд этилишича, иссиқхона мажмуаларининг табиий газга бўлган эҳтиёжини қондириш учун «ЎзГазТрейд» томонидан жорий мавсумда иссиқхона хўжаликларининг талабидан келиб чиққан ҳолда «Ҳудудгазтаъминот»га 500 миллион куб метр табиий газ қўшимча етказиб берилади. 68 та иссиқхонада тайёргарлик ишлари бўлаётгани сабабли бугунги кунда газ таъминотига эҳтиёжи йўқлиги билдирилган.
Куз-қиш мавсумида табиий газ билан барқарор таъминлаш мақсадида Ўзбекистоннинг барча ҳудудларида 244 та ихтисослаштирилган авария-диспетчерлик бригадалари ташкил этилиб, малакали мутахассислар, асбоб-ускуналар ва махсус техникалар сафарбар этилган.
Иссиқхоналарни газ таъминотидан узиш ҳолати бўйича тадбиркорларнинг норозилигидан хабар топган Шавкат Мирзиёев зудлик билан мазкур масалани кўриб чиқиш учун Президент Администрацияси раҳбари Сардор Умурзоқовга тегишли топшириқ берганди. Хусусан, Энергетика вазирлигига газ таъминотидан узилган барча иссиқхоналарни 1 кун ичида газ билан қайта таъминлаш вазифаси топширилган.
Иссиқхоналарни муқобил энергия (кўмир)га ўтказиш масаласи ҳам кўриб чиқилмоқда.
Изоҳ (0)