Ўзбекистонда аҳоли энг кўп даромад олган ҳудудлар маълум бўлди

Ўзбекистон аҳолисининг 2022 йил биринчи чораги учун умумий даромадлари маълум бўлди. Бу ҳақда Давлат статистика қўмитаси хабар бермоқда.

Январь—сентябрь ойларига кўра, аҳолининг умумий даромадлари 454,9 трлн сўмни ташкил қилган.

Аҳоли даромадлари бўйича реал ўсиш суръатларини ҳисоблашда нарх омиллари таъсирини чиқариб ташлаш мақсадида инфляция кўрсаткичларининг асосий турларидан бири – истеъмол нархлари индексидан (ИНИ) фойдаланилади.

2022- йилнинг январь—сентябрь ойларида, аҳоли жон бошига умумий даромадлар ҳажми ўртача мамлакат даражасидан юқори бўлган ҳудудлар:

• Тошкент шаҳрида (26,9 млн сўм);
• Навоий (20,1 млн сўм);
• Бухоро (15,5 млн сўм);
• Хоразм (14,1 млн сўм);
• Тошкент (13,2 млн сўм) вилоятлари.

Шу даврда киши бошига умумий даромадлар ҳажмининг энг қуйи кўрсаткичлари қайд этилган ҳудудлар:

• Қорақалпоғистон (9,3 млн сўм);
• Фарғона (9,7 млн сўм);
• Наманган (10 млн сўм);
• Жиззах (10,5 млн сўм) вилоятлари.

Аҳоли жон бошига умумий даромадларнинг энг юқори реал ўсиши Тошкент шаҳар (13,8 фоиз), Хоразм (12,8 фоиз) ва Сурхондарё (12 фоиз) вилоятларида кузатилди.

Шу билан бирга Тошкент (0,6 фоиз), Жиззах (1,3 фоиз), Навоий (3,9 фоиз), Сирдарё (5,1 фоиз) вилоятларида ҳар бир одамга умумий даромадларнинг реал ўсиши ўртача республика даражасидан паст кўрсаткични ташкил этди.

Аввалроқ Ўзбекистон аҳолисининг йил бошидан бери қанча даромад олгани маълум бўлгани ҳақида хабар берилганди.