Европа кенгаши президенти Шарл Мишел 27 октябрь куни расмий ташриф билан Ўзбекистонга келди. Олий мартабали меҳмон бугун (28 октябрь) президент Шавкат Мирзиёев билан учрашди. Шундан сўнг, Тошкент шаҳридаги Европа Иттифоқи Делегацияси офисида Шарл Мишел ва оммавий ахборот воситалари вакиллари мулоқоти ўтказилди.
Тадбирда Европа кенгаши раҳбари бир қатор масалаларда фикр юритиб, журналистларнинг саволларига жавоб қайтарди, дея хабар бермоқда «Дарё» мухбири. Қуйида мулоқот жараёнидан видео ва интервью матни эътиборингизга ҳавола қилинади.
«Ҳамкорлик асоси – мулоқот, ўзаро тушуниш ва ҳурматда»
Бугун президент Шавкат Мирзиёев билан учрашиш имкониятига эга бўлдик. Бизда умумий сиёсий ирода, мақсадларга эришиш ва ҳамкорликни кенгайтириш бўйича жуда катта режалар мавжуд.
Ўзбекистон ва Европа Иттифоқи ўртасида кенгайтирилган шериклик ва ҳамкорлик тўғрисидаги битим ҳамда GSP+ имтиёзли тизими туфайли биз иқтисодий алоқаларимизни мустаҳкамлаш ва кенгайтириш учун асосларга эгамиз. Ва биз инсон ҳуқуқлари каби бир қатор жуда муҳим мавзуларни муҳокама қилдик. Айтишим керак, биз кенг кўламли мавзуларни очиқ муҳокама қилиш имкониятини жуда қадрлаймиз.
Ўзбекистон ва Ўзбекистон президентининг минтақавий ҳамкорликни мустаҳкамлашдаги муҳим ролини юқори баҳолаймиз. Европа Иттифоқи ҳар доим шерик бўлишни, барқарорлик ва фаровонлик учун минтақавий ҳамкорликни мустаҳкамлашни қўллаб-қувватлашга тайёр.
Шарл МишелФото: «Дарё»
Яқинда Европа Иттифоқи ва Марказий Осиё ўртасидаги ўзаро боғлиқлик бўйича Самарқанд конференцияси бўлиб ўтади. Тадбирда Европа Иттифоқи томонидан жуда аниқ ва мақсадли таклифлар эълон қилинади. Бу бизнинг кейинги ҳамкорлигимиз учун асос бўлиб хизмат қиладиган қўшма лойиҳалар йўналишини аниқлаш учун асос бўлади.
Шунингдек, биз Россиянинг Украинага қарши тажовузкорлиги (уруши), озиқ-овқат, энергия хавфсизлиги инқирозига олиб келган уруш ва турли хил геосиёсий масалаларни муҳокама қилдик. Афғонистонга келсак, бу нафақат минтақа учун, балки бутун дунё барқарорлиги учун жуда муҳим масала.
Биз ўзаро алоқаларни мустаҳкамлаш мажбуриятини кўриб турибмиз ва ушбу ёндашув ҳамкорлик даражасини ва унинг самарадорлигини янада яхшилашга ёрдам беради деб ишонамиз.
Президентга айтганимдек, Европа Иттифоқида яширин кун тартиби йўқ. Биз ўз ҳаракатларимиз ва сиёсатимизни иккита муҳим принципда асослаймиз. Бу ҳамма халқларнинг фаровонлиги учун тинчлик ва хавфсизликдир. Сиёсий мулоқот, ўзаро тушуниш ва ҳурмат бу ҳамкорликнинг асосидир.
«Ўзбекистон билан кенгайтирилган шериклик ва ҳамкорлик қилишни келишиб олдик»
Ўзбекистон президенти билан жуда яхши музокаралар олиб бордик. Жуда аниқ мавзуларни муҳокама қилдик. Биз икки томонлама даражада иқтисодий алоқаларни мустаҳкамламоқчимиз. Шу билапн бирга, Ўзбекистон билан кенгайтирилган шериклик ва ҳамкорлик битимини келишиб олдик. Бу иқтисодий алоқаларни ривожлантиришга ёрдам беради. Ушбу битим Европа Иттифоқи ва Ўзбекистон ўртасида иқтисодий ҳамкорликни ва фаолиятни кучайтиришга ёрдам беради. Биз Ўзбекистоннинг Марказий Осиёда янада барқарорлик ва минтақавий ҳамкорлик учун муҳим ролини жуда қадрлаймиз.
Шунингдек, давлат раҳбари билан келажакдаги лойиҳаларни ҳам муҳокама қилдик. Масалан, келажак учун кўприк бўлган ўзаро боғлиқлик масаласини. Эвропа Иттифоқи, Ўзбекистонни қўллаб-қувватлашга, ёрдам, тажриба ва билимларини беришга тайёр.
«Технология, рақамлаштириш, энергия ва сув ресурслари бўйича таклифлар берамиз»
Келажакда биз Марказий Осиё етакчилари даражасида ўзимни иштироким билан ўзаро боғлиқлик, яшил иқтисодиёт, хавфсизлик, барқарорлик бўйича лойиҳаларни аниқлаш учун умумий йўл харитасини амалга ошириш бўйича учрашувлар ўтказамиз. Яъни шунга келишиб олинди. Бу минтақа ва Европа Иттифоқи ўртасидаги ўзаро сиёсий мулоқотни такомиллаштириш ва чуқурроқ тушуниш йўлидир.
Тарихда биринчи марта шундай форматда Остонадаги саммит бўлиб ўтди. Бу жуда яхши ва самарали учрашув бўлиб, бир-биримизни тинглаш имкониятини берди. Марказий Осиё табиий ресурсларнинг катта захирасига ва фавқулодда географик жойлашувга эга. Бу аслида Осиё ва Европа Иттифоқи ўртасидаги кўприкдир.
Шунинг учун, аниқ лойиҳалар билан ҳаракатлар харитаси ҳақида гапирадиган бўлсак, бу орқали биз барқарорлик, ривожланиш ва халқларимиз манфаати учун кўп ишлар қилишимиз мумкин.
Президент ва мен сўз эркинлиги, оммавий ахборот воситалари эркинлиги, инсон ҳуқуқлари масаласини муҳокама қилдик. Бу Европа Иттифоқининг бошқа давлатлар билан ҳамкорлигининг муҳим, ҳатто зарур элементидир.
Изоҳ (0)