«Дарё» интернет-нашри ҳамда Тошкент шаҳри ҳокимлиги қошидаги Жамоатчилик кенгаши ҳамкорлигида ташкил этилган «Маҳалла. Муаммо. Мулоҳаза» лойиҳасининг 4-сони меҳмони мустақил журналист, публицист, блогер Нозим Сафари бўлди. Кўрсатувнинг бу галги мавзуси — Тошкентнинг нон оқизадиган ариқлари қани?
Нозим Сафари қонунчиликдаги қурилиш ҳужжатларига янги нормалар киритиш таклифини илгари сурди. Бу ҳар бир қурувчига қонуний масъулият бериб қўяди, жавобгарлиги бўлади. Шу орқали натижага эришиш мумкин.
«Ҳозир шаҳарда баъзи ўринларда тартибсиз қурилиш ишлари кетяпти. Тошкент 1966 йилдаги зилзиладан кейин лойиҳалаштирилганини инобатга олсак, шаҳар инфраструктураси бунча қурилишлар, бунча аҳолига, кўплаб автомобилларга мўлжалланмаган. Лекин янги қурилаётган уйларнинг аксарияти барибир эски канализацион йўлларга уланяпти. Бунинг оқибатида босим борган сари ошмоқда.
Тошкент шаҳрининг бош режаси тайёр бўлгандан кейин алоҳида илмий кенгаш чақиртириб, шаҳар инфратузилмаси бўйича ишланмаса бўлмайди. Чунки ривожланаётган давлатларнинг четдан кўринадиган ягона нарсаси бу — қурилишлар. Давлатда қурилиш бўляптими, демак у ривожланяпти. Бизнинг иқтисодиётимиз ҳам йилига 5—6 фоиз ўсаётган бўлса, демак қурилишлар буёғига яна ҳам кўп бўлади. Бу орқали шаҳарга кўпроқ ер керак бўлади. Агар мана бундай тартибсизлик давом этадиган бўлса, яқин 10 йилликларда Бангладеш шаҳри аҳволига келиб қолишимиз мумкин.
Шу учун ҳозир биз ҳам орқага қараб, ҳам келажакни ўйлаб лойиҳалаштиришимиз керак шаҳарни», — дейди журналист.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)