Украинада қўлланаётган Эрон дронлари Ўзбекистонда ишлаб чиқарилаётгани рад этилди

Ўзбекистон Мудофаа саноати давлат қўмитаси баъзи бир оммавий-ахборот воситаларида тарқатилаётган, гўёки Ўзбекистон Украинадаги ҳарбий ҳаракатларда қўлланилаётган Эрон жанговар учувчисиз учиш аппаратларининг (жанговар дронлар) ишлаб чиқариш (йиғиш) майдони экани тўғрисидаги хабарларни қатъий инкор этди.

Шу билан бирга, Ўзбекистон ҳозирги кунга қадар ҳеч қачон Эрон томони билан ҳамкорликда қурол-яроғ ва ҳарбий техника ишлаб чиқармагани ва ҳозирги кунда ҳам ишлаб чиқармаётгани маълум қилинган.

Шу муносабат билан Мудофаа саноати давлат қўмитаси ОАВ орқали текширилмасдан туриб тарқатилаётган бу каби хабарлар жамоатчилик эътиборини ёлғон маълумотлар билан чалғитиши ҳамда Ўзбекистоннинг хорижий давлатлар билан дўстона муносабатларига салбий таъсир кўрсатишига сабаб бўлиши мумкин деб ҳисоблайди, — дейилади муносабатда.

Маълумот учун, украиналик журналист Дмитрий Гордон исроиллик миллиардер Леонид Невзлин билан уюштирган интервьюсида Россия томонидан Украина билан урушда қўлланилаётган учувчисиз дронлар Эрон, Ироқ ва Ўзбекистонда йиғилаётгани ҳақида айтиб ўтганди.

Депутат Алишер Қодиров Гордоннинг бу гапларига муносабат билдирар экан, бу маълумотлар асоссиз экани ва буни эътиборсиз қолдирмаслик кераклигини билдирган.

Бу асоссиз ва масъулиятсиз эълонни эътиборсиз қолдирмаслик керак. Ўзбекистон рус агрессиясини ҳеч қандай шаклда қўллаб-қувватламаслигини, музокаралар ва ҳудудий яхлитликни қўллаб-қувватлайдиган бетараф позициясини фуқароларимиз ҳам бутун дунё ҳам жуда яхши тушуниб бўлди. Ташқи ишлар ва Мудофаа вазирликлари бу туҳматни расман рад этиши ва Гордонни узр сўрашга мажбур қилиши керак, – деб ёзган Алишер Қодиров.