Ўзбекистон аҳолисининг йил бошидан бери қанча даромад олгани маълум бўлди

Ўзбекистон аҳолисининг 2022 йил биринчи чораги учун умумий даромадлари маълум бўлди. Бу ҳақда Давлат статистика қўмитаси хабар бермоқда.

Январь—сентябрь ойларига кўра, аҳолининг умумий даромадлари 454,9 трлн сўмни ташкил қилган.

Аҳоли даромадлари бўйича реал ўсиш суръатларини ҳисоблашда нарх омиллари таъсирини чиқариб ташлаш мақсадида инфляция кўрсаткичларининг асосий турларидан бири – истеъмол нархлари индексидан (ИНИ) фойдаланилади.

Истеъмол нархларининг ўзгариши сабабли ўтган йилнинг мос даврига нисбатан аҳоли умумий даромадларининг реал ўсиш суръати 110,7 фоизни ташкил этди.

Ўзбекистонда йил бошидан бери ҳар бир кишига умумий даромад 12,8 млн сўмга етди. Аҳоли жон бошига даромадларнинг номинал ўсиш суръати 120,5 фоиз, реал ўсиш суръати эса 108,4 фоиз бўлган.

Аҳоли жон бошига даромадларнинг реал ўсиши ўтган йилнинг шу даврига нисбатан ўзгаришсиз қолган — 108,4 фоиз.

Умумий даромаднинг 61,2 фоизини меҳнат фаолиятидан олинган даромадлар ташкил қилди. Бу кўрсаткич ўтган йилга нисбатан деярли ўзгармаган.

Аввалроқ Ўзбекистонда қайси соҳа вакиллари энг кўп маош олаётгани ҳақида хабар берилганди.