Ўзбекистонда норасмий даромадга эга аҳолига ҳам ипотека кредити бериш тартиби жорий этилади. Бу ҳақда Марказий банк раиси Мамаризо Нурмуродов журналистлар билан мулоқотда маълум қилди, дея хабар бермоқда «Дарё» мухбири.
Мамаризо Нурмуродовнинг айтишича, тегишли ташкилотлар билан ҳамкорликда мазкур тизимни яратиш ишлари бажарилмоқда.
«Бугунги кунда аҳолининг қарз юки хатарли эмас. Фақатгина битта ўйлантирадиган ҳолат бор: норматив тартибларда ипотека кредити бераётганда аҳоли даромадининг кредитни қоплашга етадиган қисми 50 фоиздан ошмаслиги кераклиги белгиланган. Бугунги кунда субсидия олаётган фуқароларга ўша нормадан чиқишга тўғри келяпти.
Лекин президентимиздан ипотека бозорини кенгайтириш ва норасмий даромадга эга аҳолига ҳам ипотека кредитлари ажратиш шароитини яратиш бўйича топшириқ бўлган. Масалан, нонвой. У ҳеч қаердан ойлик олмайди. Ҳозир биз Давлат статистика қўмитаси ва Меҳнат вазирлиги билан шундай аҳоли вакилларини ҳам ипотека кредитидан фойдаланишига шароит яратиш бўйича ишлаяпмиз. Оддийроқ қилиб айтганда, қарз юкида у қадар хавф йўқ дейилганининг сабаби бизда давлатдан, хўжалик субекатларидан ойлик оладиган одамларнинг норасмий даромад манбалари ҳам бор. Масалан, уларнинг оиласидаги кимдирнинг ёки бошқа даромад манбалари мавжуд. Шунинг учун ҳозир аҳоли қарз юкининг ошиб кетаётганини кўрмаяпмиз», – деди Марказий банк раҳбари.
Аввалроқ Мамаризо Нурмуродов Ўзбекистон Марказий банки Беларуснинг бозордаги нархларни оширишни тақиқлаш сиёсатига салбий муносабатда эканини маълум қилганди.
Изоҳ (0)