25 октябрь куни Япониянинг етакчи компаниялари билан шериклик алоқаларини ривожлантиришнинг самарали механизми бўлган иқтисодий ҳамкорлик бўйича Ўзбекистон—Япония ва Япония—Ўзбекистон қўмиталарининг 16-йиғилиши бўлиб ўтди. Бу ҳақда Инвестициялар ва ташқи савдо вазирлиги хабар қилди.
Қайд этилишича, йиғилишда Ўзбекистон томонидан вазир Жамшид Хўжаев, асосий вазирлик, идора ва тармоқ бирлашмалари раҳбарлари, Япония томонидан эса Itochu корпорацияси маслаҳатчиси, Япония—Ўзбекистон иқтисодий ҳамкорлик қўмитаси раисининг вазифасини бажарувчиси Цуёши Нишитани, Япония иқтисодиёт, савдо ва саноат вазири ўринбосари Хирохиде Хираи, Япония ташқи савдони ривожлантириш ташкилоти (JETRO) раиси ва катта ижрочи директори Нобухико Сасаки, шунингдек, 70 нафар Япониянинг етакчи компания ва ташкилотлари вакиллари иштирок этган.
Кун тартиби доирасида ўзаро савдо масалалари муҳокама қилинган. 2022 йилнинг тўққиз ойида мамлакатлар ўртасидаги товар айирбошлаш ҳажми 30 фоизга ошган. Икки томонлама савдо ҳажмини ошириш бўйича амалий чора-тадбирлар кўришдан ўзаро манфаатдорлик билдирилган.
Сармоявий ва саноат кооперациясини кенгайтириш истиқболлари кўриб чиқилган. Сўнгги беш йилда Ўзбекистонда Япония капитали иштирокидаги корхоналар сони беш баробар кўпайиб, 55 тага етган. Жорий йилда 14 та қўшма корхона ташкил этилган. Учрашув иштирокчилари фармацевтика, тоғ-кон саноати, машинасозлик, кимё ва тўқимачилик саноати, қишлоқ хўжалиги ва бошқа соҳаларда истиқболли лойиҳаларни ишлаб чиқиш ва амалга ошириш бўйича қўшма ишларни фаоллаштиришга келишиб олган.
Япониянинг энг яхши кибер, био ва нанотехнологияларини узатишни ҳисобга олган ҳолда IT ва инновациялар соҳасидаги ҳамкорлик йўналиши алоҳида кўриб чиқилган. Япония томони Ўзбекистонда рақамлаштириш даражасини 70 фоизга етказиш ва 2026 йил охиригача дастурий маҳсулотлар экспортини ўн баробар оширишни таъминлаш бўйича режаларга кўмаклашиш ниятини билдирган.
Тадбир доирасида бизнес-форум ҳам бўлиб ўтган. Унда иштирокчилар B2B ва B2Г учрашувларини ўтказиш ва ҳамкорликнинг амалий жиҳатларини муҳокама қилиш имкониятига эга бўлган.
Учрашув якунлари бўйича Якуний баённома ва тадбир давомида эришилган асосий келишувларни акс эттирувчи бир қатор икки томонлама ҳужжатлар имзоланган.
Изоҳ (0)