25-oktabr kuni Yaponiyaning yetakchi kompaniyalari bilan sheriklik aloqalarini rivojlantirishning samarali mexanizmi bo‘lgan iqtisodiy hamkorlik bo‘yicha O‘zbekiston—Yaponiya va Yaponiya—O‘zbekiston qo‘mitalarining 16-yig‘ilishi bo‘lib o‘tdi. Bu haqda Investitsiyalar va tashqi savdo vazirligi xabar qildi.
Qayd etilishicha, yig‘ilishda O‘zbekiston tomonidan vazir Jamshid Xo‘jayev, asosiy vazirlik, idora va tarmoq birlashmalari rahbarlari, Yaponiya tomonidan esa Itochu korporatsiyasi maslahatchisi, Yaponiya—O‘zbekiston iqtisodiy hamkorlik qo‘mitasi raisining vazifasini bajaruvchisi Tsuyoshi Nishitani, Yaponiya iqtisodiyot, savdo va sanoat vaziri o‘rinbosari Xiroxide Xirai, Yaponiya tashqi savdoni rivojlantirish tashkiloti (JETRO) raisi va katta ijrochi direktori Nobuxiko Sasaki, shuningdek, 70 nafar Yaponiyaning yetakchi kompaniya va tashkilotlari vakillari ishtirok etgan.
Kun tartibi doirasida o‘zaro savdo masalalari muhokama qilingan. 2022-yilning to‘qqiz oyida mamlakatlar o‘rtasidagi tovar ayirboshlash hajmi 30 foizga oshgan. Ikki tomonlama savdo hajmini oshirish bo‘yicha amaliy chora-tadbirlar ko‘rishdan o‘zaro manfaatdorlik bildirilgan.
Sarmoyaviy va sanoat kooperatsiyasini kengaytirish istiqbollari ko‘rib chiqilgan. So‘nggi besh yilda O‘zbekistonda Yaponiya kapitali ishtirokidagi korxonalar soni besh barobar ko‘payib, 55 taga yetgan. Joriy yilda 14 ta qo‘shma korxona tashkil etilgan. Uchrashuv ishtirokchilari farmatsevtika, tog‘-kon sanoati, mashinasozlik, kimyo va to‘qimachilik sanoati, qishloq xo‘jaligi va boshqa sohalarda istiqbolli loyihalarni ishlab chiqish va amalga oshirish bo‘yicha qo‘shma ishlarni faollashtirishga kelishib olgan.
Yaponiyaning eng yaxshi kiber, bio va nanotexnologiyalarini uzatishni hisobga olgan holda IT va innovatsiyalar sohasidagi hamkorlik yo‘nalishi alohida ko‘rib chiqilgan. Yaponiya tomoni O‘zbekistonda raqamlashtirish darajasini 70 foizga yetkazish va 2026-yil oxirigacha dasturiy mahsulotlar eksportini o‘n barobar oshirishni ta’minlash bo‘yicha rejalarga ko‘maklashish niyatini bildirgan.
Tadbir doirasida biznes-forum ham bo‘lib o‘tgan. Unda ishtirokchilar B2B va B2G uchrashuvlarini o‘tkazish va hamkorlikning amaliy jihatlarini muhokama qilish imkoniyatiga ega bo‘lgan.
Uchrashuv yakunlari bo‘yicha Yakuniy bayonnoma va tadbir davomida erishilgan asosiy kelishuvlarni aks ettiruvchi bir qator ikki tomonlama hujjatlar imzolangan.
Izoh (0)