Сурхондарё вилояти прокуратураси ижтимоий тармоқларда Сариосиё тумани «Жаннатмакон» маҳалласида яшовчи фуқаронинг фарзанди ўлими билан боғлиқ тарқалган видеомурожаат юзасидан маълумот берди.
Олтинсой тумани ИИБ навбатчилик қисмининг 10 августдаги хабарига кўра, соат 08:00 да туман ҳудудидан оқиб ўтувчи Ҳазарбоғ канали ирмоғидан Сариосиё тумани «Жаннатмакон» маҳалласида яшаган 27 ёшли А.И.нинг жасади топилган.
РСТЕИАМ Олтинсой тумани пунктининг 7 сентябрдаги хулосасида кўрсатилган ички текширув натижаларида марҳумнинг ички аъзоларидаги ўзгаришлар нафас етишмовчилиги натижасида вафот этгани ҳақидаги маълумотлар келтирилган бўлса-да, эксперт хулосасининг баёнот қисми билан хулоса қисмида номутаносиб ҳолати кузатилгани сабабли марҳумнинг жасади суд ажрими асосида 9 сентябрда эксгумация қилиниб, комиссион суд тиббиёт экспертизадан ўтказилган.
12 сентябрдаги ва 14 октябрдаги қўшимча комиссион суд тиббиёт экспертиза хулосаларида А.И.нинг ўлими юқори нафас йўллари бурун, оғиз бўшлиғининг суюқлик билан (сув) беркитилишидан вужудга келган механик асфиксия натижасида келиб чиққани, баданида аниқланган шилинмалар ва жароҳатлар хусусияти бўйича унинг ўлимидан сўнг канал бўйлаб оқиши жараёнида нотекис чегараланган юзаки жисмларга урилиши натижасида юзага келгани, унинг баданида қаршилик кўрсатиш, уриш, тепиш, жанжаллашиш натижасида келиб чиққан тан жароҳатлари аниқланмагани, бирламчи хулосада ўлим сабаби чўкишнинг нафас йўлларини бурун, оғиз бўшлиғининг суюқлик (сув) билан бекилиши натижасидаги спастик (нафас бойламаларининг бекилиб қолиши) дан вужудга келган механик асфиксия оқибатида келиб чиққани ҳолати инобатга олинмагани сабабли тафовут келиб чиққани кўрсатилган.
Шунингдек, А.И.нинг ўлими ҳолати юзасидан дастлабки экспертиза текшируви юзасидан хулоса беришда йўл қўйган хато ва камчиликлари учун суд-тиббий эксперт Ў.Б.га ҳайфсан интизомий жазо чораси қўлланган.
Ўтказилган терговга қадар текширув натижасига кўра, марҳумнинг ўлимида бирор-бир шахснинг ҳаракатларида жиноят таркиби аниқланмагани сабабли 17 октябрда жиноят иши қўзғатишни рад қилиш ҳақида қарор қабул қилинган.
Изоҳ (0)