Наманган вилояти ҳокимининг хизмат автомобили 5 ёшли болани уриб юборгани маълум бўлди

Наманган вилояти ҳокими Шавкат Абдураззоқовнинг хизмат автомобилида ЙТҲ содир бўлгани ҳақида хабар берилган эди. Вилоят ҳокимлиги ҳолат юзасидан ўрганиш натижаларини эълон қилди.

Маълум бўлишича, 7 октябрь куни соат 12:50 чамасида Наманган вилояти ҳокимлиги тасарруфидаги давлат рақами 50 010 ДАВ, Toyota Land Cruiser русумли автомобиль Наманган—Уйчи—Учқўрғон йўлининг 8-километрида ЙТҲга учраган. Бахтсиз ҳодиса туфайли йўлни кесиб ўтаётган, 2017 йилда туғилган фуқарони туртиб юборган. Йўловчи зудлик билан туман тиббиёт бирлашмасига олиб борилган. Тўлиқ тиббий текширув ўтказилган, жиддий шикастланиш аниқланмаган, фақатгина юз соҳасида шилиниш бўлган, тез тиббий ёрдам кўрсатилган. Қўшимча даволаниш талаб этилмайди.

Ҳозирда йўловчининг аҳволи яхши ва ўзининг уйида одатдаги ҳаётий фаолиятини давом эттирмоқда. Йўл-транспорт ҳодисаси бўйича барча ҳужжатлар ИИБ томонидан расмийлаштирилган.

Аввалроқ «Дарё» хабарга аниқлик киритиш мақсадида вилоят ИИБ, ЙҲХБ ахборот хизмати раҳбари Эркин Сатторов билан боғланганди.

Ҳа, воқеа содир бўлган. Вилоят ҳокимлиги ахборот хизмати воқеа ҳақида батафсил маълумот беришини билдирган. Шу боис биз бу ҳақда ахборот бермадик. Ҳозир ҳам сизга воқеа тафсилотларини очиқлай олмайман, — деганди «Дарё» билан мулоқотда бўлган вилоят Йўл ҳаракати хавфсизлиги бошқармаси ахборот хизмати раҳбари Эркин Сатторов.

«Дарё»нинг мазкур масала юзасидан қилинган сўровига жавоб берган Шавкат Абдураззоқовнинг матбуот котиби Фарҳод Мамадалиев ЙТҲда йўловчига зарар етмаганини, айни пайтда у соппа-соғ эканини билдирган.

Ҳолатдан батафсил хабарим йўқ. Воқеа вилоятнинг Уйчи тумани йўлида содир бўлган. Менга берилган маълумотга кўра, автомобиль йўловчига секин урилган. Шу заҳоти ҳайдовчи уни шифохонага олиб борган ва тўлиқ текширувдан ўтказган. Йўловчида ҳеч қандай синиш, чиқиш каби жароҳатлар кузатилмаган. Айни пайтда у соппа-соғ, — дейди вилоят ҳокимининг матбуот котиби.