Ўзбекистон элчиси Муҳсинхўжа Абдураҳмонов Япониянинг Аll Nippon Airlines (АNА) авиакомпанияси вице-президенти Жуничиро Миягава билан учрашди, деб хабар бермоқда «Дунё» ахборот агентлиги.
Қайд этилишича, элчи Япония томони вакилини Ўзбекистоннинг сайёҳлик салоҳияти, туризмни ривожлантириш борасида ҳаётга татбиқ этилаётган ислоҳотлар, фуқаро авиацияси бозорини эркинлаштириш бўйича кўрилаётган чора-тадбирлар, мамлакатнинг минтақавий аэропортларида «очиқ осмон» режимининг жорий этилишига доир атрофлича маълумотлар билан яқиндан таништирган.
Музокаралар чоғида Япониядан Ўзбекистон шаҳарларига тўғридан-тўғри ҳаво қатновларини йўлга қўйиш, сайёҳлар оқимини кўпайтириш ва туризм соҳасида лойиҳаларни амалга ошириш масалалари муҳокама қилинган.
Самарқандда соатига 800 нафар йўловчига ва ҳафтасига 120 тагача ҳаво қатновига хизмат кўрсата оладиган замонавий аэропорт терминали ҳамда янги сайёҳлик маркази очилганига алоҳида эътибор қаратилган.
Учрашув якунлари бўйича Япониянинг йирик шаҳарларидан Ўзбекистонга чартер ҳаво қатновларини кўпайтириш бўйича келишувга эришилган.
Изоҳ (0)