Ўзбекистонда мавжуд 10 мингтадан ортиқ мактабдан уч мингга яқинида ошхона мавжуд эмас. Бу ҳақда халқ таълими вазири Бахтиёр Саидов бугун (25 октябрь) бўлиб ўтаётган Олий Мажлис Қонунчилик палатасининг навбатдаги ялпи мажлисида маълум қилди.
Бахтиёр Саидовнинг таъкидлашича, барча мактаблардаги шароитларни бир хил даражага олиб чиқиш режалаштирилган.
«Ўзбекистонда 10 минг 100 га яқин мактаблар мавжуд бўлиб, уларда 5 миллион 200 минг нафар ўқувчи таҳсил олмоқда. Ҳозирда 3000 тага яқин мактабда ошхона мавжуд эмас. Миллий дастуримизга мувофиқ, келгуси 5 йил ичида 1 миллион 200 минг ўқувчи ўрни яратиш билан бирга, барча мактаблардаги шароитларни бир хил стандартга олиб келишни белгилаб олганмиз.
Бугунги кунда Қорақалпоғистон ва Хоразмда бошланғич синфларни бепул, яъни давлат ҳисобидан овқатлантириш тизими йўлга қўйилди. Кейинчалик бу тизим бошқа вилоятларда ҳам жорий этилади. Қолаверса, барча мактабларда ошхоналарни барпо қилиш ва аутсорсинг тизимини йўлга қўйиш режалаштирилган», – деди вазир.
Аввалроқ Ўзбекистондаги мактабгача таълим ташкилотларининг қарийб 30 фоизида (1 минг 200 га яқин) идиш-товоқларни ювишга шароит йўқлиги учун тоғоралардан фойдаланилиши хабар қилинганди.
Изоҳ (0)