Россиялик ишбилармон Роман Абрамович 1966 йил 24 октябрда туғилган. У энг бой тадбиркорлар рўйхатининг доимий аъзоси, йирик кончилик компаниялари эгаси, «Челси» футбол клубининг собиқ эгаси ҳисобланади.
Камдан-кам интервью берадиган ва ўзи ҳақида гапиришни ёқтирмайдиган миллиардернинг қандай қилиб Россиянинг энг нуфузли бизнесменларидан бирига айлангани ҳақида фотогалерея тайёрланди.
Роман Абрамович 1966 йил 24 октябрда Саратовда туғилган. Бир ёшга тўлганида онаси вафот этган. Коми шаҳридаги иқтисодий кенгашда ишлаган отаси эса Роман тўрт ёшга кирганида қурилиш майдончасидаги бахтсиз ҳодиса натижасида ҳалок бўлган.
Шундан сўнг, унинг тарбияси билан амакиси шуғулланган. Биринчи синфни тугатгандан сўнг, Роман Абрамович Москвадаги қариндошларининг уйига кўчиб ўтган ва у ерда ўрта мактабни тамомлаган.
Мактабни тугатгач, Роман Абрамович Владимир вилоятидаги артиллерия бўлинмаларида хизмат қилди.
Борис Ельциннинг қизи Татяна Юмашева Роман Абрамовичнинг ҳарбий хизматни қандай якунлагани ҳақида шундай ҳикоя қилади:
«Демобилизация аккорди» деган нарса бор. Бу армияни тарк этган аскар ўз бўлинмаси учун фойдали иш қилиши кераклигини англатади. Романга келажакда қуриладиган йўл учун ўрмонда тозалаш ишларини олиб бориш буюрилган.
У ўрмонни тенг квадратларга бўлиб, энг яқин қишлоққа кетган ва у ердаги уйлар эса одатдагидек, печкада иситилади — ҳар бир киши ўтин билан боғлиқ муаммоларга дуч келади.
Роман у ерга бориб, ўзига ишониб топширилган участкада ўрмон кесиш ҳуқуқини сотаётганини айтади. Бутун қишлоқ эса ўрмонни тозалашга шошилади.
Икки кундан сўнг, бутун тозалаш ишлари якунланади. Учинчи куни эса Роман Абрамович ўз бўлинмаси билан абадий хайрлашиб, уйига кетади.
Мен ундан «пулни нима қилдинг?», деб сўраганимда у маблағни уч қисмга бўлганини айтди: Бир қисмини офицерларга, иккинчиси қисмини хизматда қолган дўстларига ва учинчи қисмини «демобилизация аккорди» иштирокчиларига.
Армиядан кейин бўлажак миллиардер «Ухта» саноат институтига ўқишга киради, аммо уни тамомламасдан бизнесга киришиб кетади.
1989 йилда у Москвада болалар пластик ўйинчоқларини сотиш бўйича «Уют» кооперативини тузади ва унга раҳбарлик қилади. Кейин Абрамович биржа брокерига айланиб, нефть маҳсулотлари савдосига ўтади.
1990 йилларнинг бошларида Абрамович АВК корхонасини бошқарган. АВК бошқа нарсалар қаторида нефть маҳсулотларини қайта сотиш билан шуғулланган.
Баъзи маълумотларга кўра, 1992 йилда тергов органлари тадбиркорни давлатга қарашли Ухта нефтни қайта ишлаш заводидан 55 та дизель ёқилғиси бакини ўғирлашга алоқадорликда гумон қилган. Кейин эса далиллар йўқлиги сабабли иш ёпилган.
1990 йилларнинг ўрталарида Абрамович Бутунроссия автомобиль альянси бош директори Борис Березовский билан учрашади. Директор ёш тадбиркорга нефть бизнесига киришни таклиф қилади.
Тандем бу бизнесда муваффақиятга эришди: хусусан, 1996 йилда Абрамович ва Березовский билан боғлиқ тузилмалар янги ташкил этилган Сибнефть компаниясининг 70 фоиздан ортиғини сотиб олди.
Ўшанда матбуот Абрамович нефть компаниясидаги улуш учун 100,3 миллион доллар сарфлаганини тахмин қилган.
Худди шу даврда ёш тадбиркор Россия президенти Борис Ельциннинг оиласига яқинлашган. Унинг қизи Татяна ва куёви Валентин Юмашев миллиардер билан дўстона муносабатларини яширмаган.
Мен уни биринчи марта Татяна Юмашеванинг дачасида кўрганман. Танядан у йигит кимлигини сўраганимда «Бу Рома Абрамович. У ким билан, қандай қилиб дўстлашишни билади», деган эди, — деб эслайди Борис Немцов Роман Абрамович билан биринчи учрашуви ҳақида.
Кўпгина таҳлилчилар ва журналистларнинг фикрича, Абрамовичнинг муваффақиятига айнан президент атрофидагилар билан яқин муносабатлари сабаб бўлган.
1999 йилда Роман Абрамович Чукотка бир мандатли сайлов округи бўйича Давлат Думасига кирган. Орадан бир йил ўтар-ўтмас округ губернатори лавозимига ўзини-ўзи номзод қилиб кўрсатган.
Унинг номзодини, хусусан, Анатолий Чубайс қўллаб-қувватлаб, «ҳақиқатан ҳам Чукоткада бизнесмен тартибни тиклаши мумкин» деб айтади. Шундан сўнг, сайловда Абрамовичга 90,61 фоиз овоз йиғиб, ғолиб бўлади.
Миллиардер бир неча бор губернаторлик лавозимини тарк этмоқчи бўлади. Бироқ ҳар сафар Владимир Путин билан учрашгандан сўнг, ниятидан воз кечади.
Абрамович губернаторлик раислигини фақат 2008 йилда, ўша пайтдаги Россия президенти Дмитрий Медведев унинг «ўз хоҳиши билан» истеъфога чиқиш ҳақидаги аризасига имзо чекканидан сўнг кетган.
2000 йилларнинг бошларида Роман Абрамович ўз бизнесини сезиларли даражада кенгайтиради. Шундай қилиб, унинг иштирокида Сибнефтнинг алюминий ва энергетика активлари Олег Дерипасканинг Сибир алюминийи билан қўшма Русал компаниясига бирлаштирилади.
Худди шу даврда Абрамович шериги Борис Березовскийдан «Сибнефть»даги улушини, шунингдек, Березовскийнинг ОPT телеканалидаги (ҳозирги «Первий канал») 49 фоиз улушини ва «Аэрофлот»даги 26 фоиз улушини сотиб олади.
Миллиардер 2003—2005 йилларда авиакомпаниядаги улушини сотиб юборган. 2005 йил сентябр ойида «Газпром» Абрамовичдан «Сибнефть»нинг 72,6 фоиз улушини 13 миллиард долларга сотиб олган.
Бундай хатти-ҳаракатлар икки тадбиркор ўртасидаги муносабатларнинг узилишига олиб келади. 2007 йилда Березовский «ҳокимият босими остида» акцияларни сотаётганини айтиб, Абрамовичдан 5,6 миллиард доллар тўлашни талаб қилади.
Суд жараёни бир неча йил давом этади, аммо натижада Лондон суди Березовскийнинг даъволарини рад қилади.
2003 йилда Роман Абрамович уни бутун дунёга машҳур қилган шартнома тузган — 140 миллион фунт стерлингга Англиянинг «Челси» футбол клубини сотиб олган.
2004 йилда яхтада бир неча кун ўтказиб, ажойиб дам олганмиз. Ўшанда Абрамович «Порту»нинг ғалабаси учун тост қилганди. Мендан нима истаётганини бир оғиз ҳам айтмаган бўлса-да, саёҳат охирида ҳамма нарсани тезда келишиб олган эдик, — деб эслайди шу вақтда клубни бошқарган мураббий Жозе Моуриньо.
Forbes журнали бўйича дунёнинг энг бой одамлари рейтингига Роман Абрамович 2001 йилда кирган, унинг бойлиги 1,4 миллиард долларга баҳоланган. 2005—2007 йилларда у Россиянинг энг бой одами бўлган.
Айни пайтда Роман Абрамович «Кипр офшор Ланеброок лимитед» орқали бошқарадиган Evraz металлургия холдингининг энг йирик акциядори.
Унинг ихтиёрида «Норилск Никeл» компаниясининг 6 фоизга яқин акциялари мавжуд (2018 йил март ойида тадбиркорнинг 4 фоиз акцияларини сотиш нияти маълум бўлган эди).
2011 йилда у «Первий канал»нинг 25 фоиз улушини Юрий Ковалчукнинг Миллий медиа гуруҳига сотди ва 24 фоизи улушини ўзида сақлаб қолди. 2018 йил августида эса улушини 20 фоизга қисқартирди.
2015 йилгача Абрамович ўз активларининг катта қисмига Лондонда жойлашган Millhouse Capital орқали эгалик қилган. Ўтган ёзда компания тугатилди ва активлар оффшор компаниялар орқали назорат қилина бошлади.
Шунингдек, 2017 йилнинг декабрида Роман Абрамовичнинг Енисей Capital компанияси ТransContainer’нинг 24,5 фоиз улушини сотиб олган.
Британиянинг The Sunday Times газетасига кўра, Роман Абрамовичнинг қўриқлаш хизмати 20 нафар хавфсизлик мутахассисидан иборат. Тадбиркорга дунё бўйлаб саёҳатларида ва Россияга ташрифларида бир хил миқдордаги тансоқчилар ҳамроҳлик қилади.
Абрамович охирги марта 2011 йилда Чукотка автоном округи Думасига сайловлар олдидан даромадлари тўғрисидаги ҳисоботни эълон қилган эди.
Ҳужжатга кўра, тадбиркор ўша пайтда Россия, АҚШ, Буюк Британия ва Францияда 12 та ер участкаси, тўққизта уй, еттита квартира, еттита автомобиль ва еттита компания акцияларига эга бўлган.
Пул бахт келтира олмайди. Мустақиллик — ҳа, маълум даражада.Роман Абрамович.
Роман Абрамович яхталарга бўлган иштиёқи билан машҳур. У энг йирик хусусий кемалардан бири — узунлиги 162 метр бўлган Eclipse яхтасига эгалик қилади, унинг қиймати 2010 йилда 400 миллион долларга баҳоланган.
Бундан ташқари, мутахассисларнинг фикрича, Абрамовичнинг бадиий коллекцияси 1 миллиард долларга етиши мумкин.
Роман Абрамович уч марта уйланган. Биринчи рафиқаси Олга Лисова билан тадбиркор карерасининг бошида ажрашган.
Абрамовичнинг иккинчи хотини собиқ стюардесса Ирина Маландина эди. 2007 йилда улар ажрашди. Баъзи маълумотларга кўра, ажрим учун тадбиркорнинг тахминан 3 миллиард доллар тўлов тўлаган.
Миллиардернинг учинчи рафиқаси Москванинг «Гараж» музейи асосчиси, дизайнер ва коллектор Дариа Жукова эди.
2017 йил август ойида Роман Абрамович ва Дариа Жукова ажралишларини эълон қилди. Тадбиркорнинг етти фарзанди бор: Иля, Аркадий, Анна, Софя ва Арина — иккинчи никоҳдан, Аарон Александр (расмда) ва Лея — учинчи никоҳидан.
Менимча, маълум бир оммавий ахборот воситалари ёритаётган одам ва мен бошқа-бошқа одамлармиз. Улардан қайси бири яхшироқ эканини ҳукм қилиш мен учун эмас. Аммо бир нарса аниқ: у мен эмасман, — дейди ишбилармон.
2022 йил якунлари бўйича Россиянинг Forbes рейтингида тадбиркор 6,9 миллиард доллар бойлиги билан 16-ўринни эгаллади.
2022 йил май ойида Россияга қарши санкциялар туфайли миллиардер Англиянинг «Челси» футбол клубини сотишга мажбур бўлди. Битим 4,25 миллиард фунт стерлингни ташкил этди.
Бироқ Роман Абрамович бу пулни олмаган. Ундан 2,5 миллиард фунт стерлинг хайрияга кетган, қолган 1,75 миллиард эса жамоа ва стадионга 10 йиллик муддатга кафолатланган сармоядир.
Россиянинг Украинадаги уруши бошланганидан кейин Роман Абрамович Россия—Украина музокараларида қатнашган, бироқ ҳеч бир делегация аъзоси бўлмаган.
Изоҳ (0)