Йил бошидан бери Ўзбекистон энг кўп қайси давлатларга мева-сабзавот сотгани аниқланди

2022 йилнинг январь—сентябрь ойлари давомида Озбекистондан хорижий мамлакатларга умумий қиймати 760,2 миллион долларга тенг бўлган 1,23 миллион тонна мева-сабзавот маҳсулотлари экспорт қилинган. Бу ҳақда Прогнозлаштириш ва макроиқтисодий тадқиқотлар институти хабар бермоқда.

Бу эса 2021 йилнинг шу давридаги кўрсаткичга нисбатан 21,7 фоиз кўп демакдир.

Мева-сабзавотлар экспортида қиймат жиҳатидан энг катта улушни узум (майиз қўшган ҳолда) — 21,2 фоиз, шафтоли — 9 фоиз, мош — 6,1 фоиз, помидор — 5,9 фоиз, қовун ва тарвуз — 4,7 фоиз, гилос — 4,4 фоиз, карам — 4,3 фоиз, пиёз — 3,8 фоиз эгаллайди.

2022 йилнинг январь—сентябрь ойларида экспортнинг умумий ҳажмида мева-сабзавотлар улуши 5,4 фоизни ташкил этган.

Ўзбекистон мева-сабзавот маҳсулотларининг асосий импорт қилувчилари Россия (44,4 фоиз), Қозоғистон (21 фоиз), Хитой (6,8 фоиз), Покистон (6,4 фоиз), Қирғизистон (4,4 фоиз), Афғонистон (2,6 фоиз), Туркия (2,3 фоиз), Беларусь (1,9 фоиз), Эрон (1,3 фоиз), Озарбайжон (1 фоиз) ҳисобланади.

Аввалроқ Ўзбекистон бозорларида октябрь ойидаги нархлар қандай озгараётгани ҳақида хабар берилганди.