Ўзбекистонда хизмат кўрсатган артист Саида Раметова «Севимли» телеканалининг «Машҳурлар» кўрсатувига берган интервьюсида саратон касаллигини қандай енггани, келинлари билан қандай муносабатда экани, талабалик йиллари, ота-онасига берган ваъдаси, уни асоссиз театрдан ишдан бўшатишгани ва бу ҳолат у учун оғир бўлгани, ҳозирги актриса ва актёрларнинг фаолияти ҳақида гапирди.
Саида Раметова умрининг қайси йилларини соғиниши ҳақида
«Тўғрисини айтсам, яқинда ёшлик йилларимни кўп эсладим. Елиб-югуриб тинмасдан ролларни ижро этганимни ёдга олдим. Кейин ўзимга-ўзим яхши ҳам тиниб-тинчимасдан кинода, сериалда, театрда кўп ролларни ижро этган эканман дедим, ҳозир икки йилдан буён рол ижро этишни сал камайтирдим. Соғлиғим туфайли, шунда ҳам нолимайман, Аллоҳнинг суюкли бандаси эканман, кўпчиликнинг дуоси, ўзимнинг ғайратим билан кўплаб кўрсатувлар, сериал, кинода рол ижро этдим. Театрда имкон борича енгилроқ, комедия ролларимни ижро этдим, уч-тўртта классика, тарихий спектаклларимдаги ролларни эса ижро этмай турибман. Энди рухсат беришди, ўша ролларимни эслаб юрибман, ўйнаш ниятим бор. Аллоҳ куч-қувват берсин.
«Кейин ёшлик даврларимни, опа-сингил, ака-ука, қариндошларим билан ўтган яхши кунларимни эслайман ва нимага бунчалик умр тез ўтяпти, бир пасда катта бўлиб қолдик, ёшлик, жўшқин, кучга тўлиб юрган вақтларимиз тез ўтиб кетгандек гўё. Ҳаётнинг қанчалик ширин, ҳар бир дақиқанинг қадрига етиш керакдек туюлади. Ҳар бир кунга шукрона айтгим келади», — дейди актриса.
«Ҳаракат қилдим, ўзимда куч топа олдим»
«Ҳаётни, касбимни яхши кўрганимдан касалликни енга олдим, ҳаёт, яшаш яхши. Бу касаллик билан курашмасангиз ‘олиб кетади’. Шифокорларга, профессорларга раҳмат, ‘ҳаётга ишонч билан қара, бу касаликка енгилиб қолма’, деб кўп нарсаларни ўргатишди. Улар саратон касаллиги ҳақида китоблар беришди, ўқидим, ҳаракат қилдим, ўзимда куч топа олдим. Мен касал эканман деб ваҳимага тушиб, умидсиз бўлиб, шунақа аёллар ҳам бўлди, мен уларга ҳам куч бера олдим. Мени кўриб улар ҳам ҳаракат қилишди. Яқинда ҳам бордим, текширтирдим, ҳаммаси яхши.
Бироқ бари бир муолажани давом эттириб, парҳез қилиш, ўзимга қарашим, умид, ишончни йўқотмаслик керак. Бу касалликда ғам-ташвиш, қанақадир ёмон нарсаларни ўйламаслик, иложи борича куч тўплаб яшаш керак. Касал бўлган аёлларнинг олдига бордим, суҳбатлашдим, улар билан овқатландим. Аёл оилада керак, аёл борки, дунё, бешик тебраниб туради. Шунинг учун биз ҳам ўзимизни ўйлашимиз керак. Касаллик ўтиб кетгандан кейин эмас, олдинроқ бориб, олдинроқ даволанишимиз керак», — дейди Саида Раметова.
«Келинларим аҳил, иноқ, шундан хурсанд бўламан, бахтли қайнонаман»
«Биринчи ўғлим 21 ёшида уйланган. Келинимни яхши кўриб, совчиликка борганман. Қудаларим ҳам, келиним ҳам яхши, совчиликка борганимда озгина қийналганман. ‘Сизни яхши кўрамиз, ҳурмат қиламиз, лекиб қизимизни бермаймиз’ дейишди. Нимагалигини сўрадим, менимча санъаткорларнинг ичида ҳамма томонлама ибратли аёл санъаткор бўлиб юрибман десам, ‘сиз ёмон қайнонасиз’, дейишган. Шу билан рози бўлишди, мана 20 йил бўлди, биз ҳозир келиним билан она-боладекмиз. Яқинда катта ўғлим эгизак фарзандли бўлди. Кейин Азизбекка ёшинг ўтди, уйлан дедим. Эрта-индин деб ўзи ҳам ёши ўтганини билмай қолди.
Хуллас, бари бир Аллоҳ ўзини никоҳини ташламагунча икки ёшнинг қалбини бирлаштириб бўлмас экан. Қачон Аллоҳ никоҳини ташласа, пешонасига ёзилгани бўлар экан, пешонадан қутулиб бўлмас экан. Мана ёзилган экан, 33 ёшида уйланди. Ролларни ижро этганим билан ҳаётда хурсанд бўламан, келинларимни ёнини оламан, улар билан она-бола бўлганман. Ҳозир иккинчи келиним ҳам қизимдек. Ёнма-ён яшаймиз, улар алоҳида, биз алоҳидамиз. Иккаласи ҳам кириб бир-бири билан иш қилса, опа-сингилдек бўлиб юрса, маслаҳат қилишса, бу келиним ҳам овсинига ёрдам беради. Фотима ва Зуҳраларга қараб, овқат қилишса бир-бирига узатишади. Аҳил, иноқ, шундан хурсанд бўламан, бахтли қайнонаман», — дейди актриса.
Актриса ота-онаси санъат соҳасига киришига қарши бўлгани ва уларга берган ваъдаси ҳақида
«Ўқиган пайтларим эсимга келади, ётоқхонада яшаганман, ўша ерда ‘старста’ қилишган эди. Ҳамма томонлама зўр эдим, қизлар бирорта йигитга қараса, ўқишингни ўқи, соат нечида келдинг деб хоналарини текшириб чиқар эдим. Ўша пайтда менга ‘қайнона’ деб лақаб қўйишган. Ҳаммани текшириб юрасан, сенга нима дейишар эди. ‘Старста’манми менинг курсимда ҳамма нарса жойида бўлиши керак дердим. Ўшанда бу қайноналик қилади деб менга ҳазил қилишар эди. Ҳақиқатан ҳам қайнона ролида танилдим, ўша гапни ҳам ҳикмати бор экан. Ўша пайтда уйдан ҳам кўп пул сўрамасдан ўзим ҳаракат қилар эдим.
Чунки ўқишга кирганимдан кейин ҳам рухсат беришлари қийин бўлган. Отам, раҳматли бобо-бувим қарши бўлган, фақат онам рози бўлган, лекин билдирмаган. Ичларидан, мени айнан санъатга қизиқишим учун актриса бўлишимни чин дилдан хоҳлаган. Онамда маҳорат бор эди, шеър, қўшиқ айтган, жуда кўп нарсага қизиқардилар. Улар ‘Мен жуда ҳам хоҳлар эдим, лекин менга рухсат беришмаган, сен кирдинг, бироқ бизни юзимизни ерга қаратма, сен томондаман, ўзингни билиб юргин, ҳамма нарсада иффатингни унутма’, — деб айтган.
Насиб бўлса ўқишимни битириб, ҳурмат-иззатим билан турмушга чиқаман, фарзандлар кўраман, санъаткорларга орзу қилиб шу касбни эгалладимми, шулардек бўлишга ҳаракат қиламан, Аллоҳ риз-насиба берса, сабр қилиб битта турмуш ўртоғим билан умр ўтказишга, фарзандларим катта бўлганида қуда-андалик бўламан, уларнинг ҳам олдида артистда, шунинг учун ажралди деган гапни кўтара олмайман, сизларнинг ҳам юзингизни ерга қаратмайман, деганман.
Аллоҳга шукр, уларга нима ваъда берган бўлсам, бажардим, Тошкентга келганимга 45 йилдан ошибди, Жумадулла Раметов билан турмуш қурганимга ҳам, санъат соҳасида ишлаётганимга ҳам 40 йил бўлибди. Барча қийинчиликларга чидадим. Ётоқхонада яшаб юрган вақтларимда оч қолган кунларим ҳам бўлди, ўзимга ва бирортасига хиёнат қилмадим. Ҳаммасига сабр қилдим», — дейди актриса.
«Менга осон бўлмаган, буни Аллоҳ ва биз ўзим биламан»
«Яхши ишлаб, яхши ижод қилиб келаётган эдим. Кейин нима бўлди билмайман, ёки кимдир директоримизга мен ҳақимда бирор нарса дедими, билмадим. Кейин менга кўп гапира бошладилар, мен у гапларни эшитишга арзимайман, мен у даражадаги гапларни эшитадиган актриса эмасман. Шунча йил ишлаб, меҳнат қилиб нимага ҳаракат қилдим, касбимни, юртимни яхши кўраман. Ор-номус, андиша учун талашдим. Ҳаммасини кўнглини олишга ҳаракат қилдим. Жумадулла Раметов билан турмуш қуриб, нима бўлса охиригача туришга ҳаракат қилиб келдим. Бизнинг орамиздан ҳам кўп нарса ўтган, душманликлар бўлган.
Шунча сабр-тоқатли бўлсам, нимага менга бунча муносабат деганман, гоҳида шу нарса алам қилади. Ёки мен ҳаётда нотўғри қадам босдимми дейман, ўзимга-ўзим савол бераман. Ҳалол яшаб меҳнат қилишга ҳаракат қилдим, ўзимга нимани раво кўрсам бошқаларга ҳам шуни раво кўраман. Қўлимдан келса яхшилик қиламан, охири гап-сўзларни кўтара олмадим. Мени ҳеч ким театрдан ҳайдамади, ўзим ишдан бўшашга ариза ёздим. Мен бунақа шароитда, атмосферада ишлай олмайман, кетаман дедим.
Театрдаги ҳамкасбларим, устозларим, директоримни ўзи ҳам чиққанидан кейин мени қучоқлаб олди. ‘Мен сенга хайфсан бермоқчи эдим, кетма’, деди. Мен эса кетаман дедим. Шу билан театрдан ўзим ариза ёзиб кетдим. Тўғри менга осон бўлмаган, буни бир ўзим ва Аллоҳ билади. Чунки меҳр бериб ишлагандан кейин, умид ва ишонч билан ҳамма томонни йўлга қўйиб яшаган вақтда шунақа вазият бўлса қийин бўлар экан. Бироқ ўша пайтда ҳам бўш қолмадим, кино, сериал, тўй хизмлатларига бордим. Мен буни ҳеч қачон беркитмаганман, уялмаганман, халқ мени яхши кўрар экан, борганман, бораман ҳам», — дейди Саида Раметова.
Саида Раметова ҳозирги ёш актриса ва актёрларнинг фаолияти ҳақида
«Ёшларни ҳам кўп айблашни хоҳламайман. Чунки кўриб турибман, ўзимизни театрда ҳам, бошқа театрда ҳам ёшлар ҳаракат қилади, ўзини устида ишлайди, устозларга яхши муносабатда бўлади. Бизни пайтимизда бир фильмда ишлаш, банд бўлиш қийин эди, нечта чиғириқдан ўтиб, йиллаб рол кутар эдик. Шунинг учун санъатнинг қадирга етар эдик, ҳозирги ёшлар бахтли. Йиллар давомида касбимизга садоқат билан ёндашиб танилдик. Мен ҳар доим айтаман, клип, сериал, реклама кетма-кет, битта актриса еттита-саккизта сериалда чиқяпти, бу бахт. Буни қадрига етиб меҳнат қилиш ва шукр айтиш керак. Ҳаттоки ҳозирги ёшларимиз ‘йўқ, мен кўп ролларда чиқдим, озгина танаффус қилай’ дейишади. Биз эса ролни йиллаб кутар эдик», — дейди актриса.
Мавзуга доир:
- Instagram: Саида Раметовага Умрага йўлланма совға қилишди, Салимбойвачча билан танишган Эрали, ажрашганига ишора қилган Муқаддас Саъдуллаева.
- Instagram: Эгизак неварали бўлган Саида Раметова, Каниза Tashkent City’дан уй олганидан афсусда, Муқаддас Йигиталидан «калтак еди».
- Азиз Раметовнинг тўйи санаси маълум бўлди. Саида Раметова кенжа келинини қандай топгани ҳақида сўзлаб берди (видео).
- Instagram: Воҳиджон Исоқов ота бўлди, Саида Раметова туғилган кунини қандай нишонлади? «Дайди қиз» кимнинг устидан ИИБга арз қилмоқчи?
Изоҳ (0)