Red Bull энергетик ичимликлар компанияси асосчиси ва «Формула 1» компаниясининг шу номдаги жамоаси эгаси, австриялик миллиардер Дитрих Матешитс 78 ёшида вафот этди. Бу ҳақда Red Bull пойга жамоаси раҳбари Кристиан Хорнер маълум қилди, деб ёзади Reuters.
Дитрих Матешитс ва таиландлик инвестор Чалео Ювидя 1982 йилда Red Bull компаниясига асос солган. Матешитс ичимлик формуласи устида бир неча йил ишлаган, 1987 йилда маҳсулот Австрияда сотила бошлаган. 2021 йилда компания дунёнинг 172 мамлакатида қарийб 10 миллиард қадоқда ичимлик сотган.
Компания ривожланиши билан Матешитс спортга, айниқса, автопойга ва экстремал спортга сармояларни сезиларли даражада оширди. 2004 йилда Матешитс Ford компаниясидан Jaguar пойга жамоасини сотиб олди ва унинг асосида Red Bull Racing’ни яратди, бу пойга жамоаси 2010—2013 йилларда «Формула 1» конструкторлари чемпионатида тўрт марта ғолиб чиқди, унинг пойгачиси Себастьян Феттел эса тўрт марта чемпион бўлди. Шунингдек, Red Bull турли мамлакатлардаги футбол ва хоккей жамоаларига эга.
Forbes Дитрих Матешитснинг бойлигини 20 миллиард доллардан ортиқ деб баҳолаган.
Изоҳ (0)