Фарғонада боғчада 20 нафардан ортиқ бола овқатдан заҳарлангани ҳақидаги хабарлар рад этилди

Фарғона вилояти Олтиариқ туманидаги 13-сонли давлат мактабгача таълим массасасининг 20 нафардан ортиқ тарбияланувчиси овқатдан заҳарланиб, шифохонага ётқизилгани ҳақида хабарлар тарқалди. Санитария-эпидемиологик осойишталик ва жамоат саломатлиги хизмати ҳолат юзасидан маълумот берди.

Олиб борилган тезкор ўрганишларга асосланиб маълум қилинишича, 21 октябрь куни соат 11:45 лар атрофида Олтиариқ туманидаги 13-сонли давлат мактабгача таълим ташкилотининг бир гуруҳ тарбияланувчиларида тана ҳарорати кўтарилиши оқибатида Повулғон оилавий шифокор пунктига мурожаат бўлган.

Суриштирув давомида аниқланишича, мазкур боғчада бир кун аввал «Ҳосилжон-меҳржон» байрами ўтказилиб, тадбир доирасида ташкил этилган кўргазмали стол дастурхони қатор қишлоқ хўжалиги маҳсулотлари, жумладан, узум, хурмо, олма, банан, тарвуз ҳамда турли қандолатлар билан безатилган. Болалар эса ушбу егуликлардан тартибсиз равишда истеъмол қилган.

21 октябрь куни оилавий шифокор пунктига бўлган мурожаат асосида 8 нафар бемор туман тиббиёт бирлашмасининг юқумли касалликлар бўлимига ётқизилган. Дастлабки текширувлар натижасига кўра, уларда овқатдан заҳарланиш белгилари кузатилмаган.

Ҳозир ушбу болажонларнинг умумий ҳолати қониқарли. Тегишли симтоматик даво муолажаларидан сўнг кичкинтойлардан 5 нафарига уйга жавоб берилган.

«Шифохонага ётқизилган боғча тарбияланувчиларидан олинган тиббий таҳлил намуналари лабораторияга юборилган. Ҳолат юзасидан мутахассислар томонидан текширув-суриштирув ишлари давом эттирилмоқда. Айни пайтда мазкур ўғил-қизлар саломатлигини Санитария-эпидемиологик осойишталик ва жамоат саломатлиги хизмати ҳамда Мактабгача таълим вазирлиги ўз назоратига олган», — дейилади хабарда.