Andijon viloyatining Shahrixon tumani va Xonobod shahrida chet el valyutalarining noqonuniy muomalaga kiritilishining oldi olindi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Xonobod shahar bo‘limi tomonidan tezkor tadbir o‘tkazilgan. Unda Izboskan tuman dehqon bozori atrofida valyuta ayirboshlash bilan shug‘ullanib kelgan N.S. (muqaddam Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan sudlangan) va S.N. fuqaro G.ga jami 3 600 dollarni 40,5 million so‘mga sotgan vaqtida ushlangan.
Shuningdek, departamentning Shahrixon tuman bo‘limi tomonidan IIB xodimlari bilan hamkorlikda tezkor tadbir o‘tkazilgan. Unda dehqon bozori hududida valyuta ayirboshlash bilan shug‘ullanib kelgan T.M. fuqaro Q.ga 3 500 dollarni 39,4 million so‘mga sotgan vaqtida ashyoviy dalillar bilan qo‘lga tushgan.
Mazkur holatlar yuzasidan Jinoyat kodeksining 177-moddasi bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)