Ўзбекистоннинг ташқи савдода Хитой ва Россияга иқтисодий қарамлиги янада кучаймоқда. Бу ҳақда иқтисодчи Отабек Бакиров Telegram’даги каналида фикр билдирди.
Отабек Бакировнинг ёзишича, иқтисодий тобеликнинг кучайиб боришига ташқи савдонинг эркинлаштирилмаётгани сабаб бўлмоқда.
Афсуски, агрессия ва сиёсий элитани коррупциялаштириш асосий қадрияти бўлган бу икки давлатнинг Ўзбекистонга иқтисодий таъсири шиддат билан юксалмоқда. 9 ой якунларига кўра, Хитой ва Россиянинг мамлакатимиз ташқи савдосидаги улуши 37 фоиздан ошган, бу кўрсаткич йил бошида 35,6 фоиз, 2020 йил якуни бўйича эса 33,2 фоиз эди.Давлат статистика қўмитасининг маълум қилишича, 2022 йилнинг январь-сентябр ойларида Ўзбекистоннинг ташқи савдо айланмаси ҳажми 36 миллиард 24 миллион АҚШ долларини ташкил этиб, 2021 йилга нисбатан 7 миллиард 701 миллион АҚШ долларига (27,2 фоиз) кўпайган. Хусусан, экспорт ҳажми 14 миллиард 51 миллион долларни(35,7 фоиз), импорт 21, 9 миллиард долларни ташкил этган(22,3 фоиз) кўпайди.Хитой ва Россияга қарамлик ошиши қўшниларимиз билан, Туркия билан савдо улуши пасайиб бораётгани шароитида юз бераётгани икки карра муаммо. Ўтган 1 йил давомида бевосита бешта қўшнимиз билан савдо улуши 17,6 фоиздан 15,7 фоизгача пасайган. Туркия билан савдо улуши эса 8,6 фоиздан 6,8 фоизгача қисқарган. Туркияга экспортимиз, Туркманистондан импортимиз жисмонан қисқаряпти.
Ҳукумат ташқи савдо концентрациясини иқтисодий ва геосиёсий хавф ўлароқ кўришни истамаётган бўлиши мумкин. Чунки ташқи савдо диверсификацияси импортни эркинлаштиришни, протексионизмдан воз кечишни талаб этади. Айнан протексионизм нафақат ўзбекистонликларни камбағаллаштирмоқда, балки бизни янада кўпроқ шарқдаги ва шимолдаги гигант давлатларга боғлиқликни кучайтирмоқда.
Отабек Бакиров, иқтисодчи.
Аввалроқ Ўзбекистоннинг январь–июль ойларидаги ташқи савдо айланмаси таркиби эълон қилинганди. Мазкур даврда мамлакат экспорти ҳажми 11,3 миллиард долларни, импорти 16,8 миллиард долларни ташкил этган.
Изоҳ (0)