“O‘zbekistonga Xitoy va Rossiyaning iqtisodiy ta’siri shiddat bilan kuchaymoqda” — iqtisodchi Otabek Bakirov

O‘zbekistonning tashqi savdoda Xitoy va Rossiyaga iqtisodiy qaramligi yanada kuchaymoqda. Bu haqda iqtisodchi Otabek Bakirov Telegram’dagi kanalida fikr bildirdi.

Otabek Bakirovning yozishicha, iqtisodiy tobelikning kuchayib borishiga tashqi savdoning erkinlashtirilmayotgani sabab bo‘lmoqda.

Afsuski, agressiya va siyosiy elitani korrupsiyalashtirish asosiy qadriyati bo‘lgan bu ikki davlatning O‘zbekistonga iqtisodiy ta’siri shiddat bilan yuksalmoqda. 9 oy yakunlariga ko‘ra, Xitoy va Rossiyaning mamlakatimiz tashqi savdosidagi ulushi 37 foizdan oshgan, bu ko‘rsatkich yil boshida 35,6 foiz, 2020-yil yakuni bo‘yicha esa 33,2 foiz edi.

Xitoy va Rossiyaga qaramlik oshishi qo‘shnilarimiz bilan, Turkiya bilan savdo ulushi pasayib borayotgani sharoitida yuz berayotgani ikki karra muammo. O‘tgan 1 yil davomida bevosita beshta qo‘shnimiz bilan savdo ulushi 17,6 foizdan 15,7 foizgacha pasaygan. Turkiya bilan savdo ulushi esa 8,6 foizdan 6,8 foizgacha qisqargan. Turkiyaga eksportimiz, Turkmanistondan importimiz jismonan qisqaryapti.

Hukumat tashqi savdo konsentratsiyasini iqtisodiy va geosiyosiy xavf o‘laroq ko‘rishni istamayotgan bo‘lishi mumkin. Chunki tashqi savdo diversifikatsiyasi importni erkinlashtirishni, proteksionizmdan voz kechishni talab etadi. Aynan proteksionizm nafaqat o‘zbekistonliklarni kambag‘allashtirmoqda, balki bizni yanada ko‘proq sharqdagi va shimoldagi gigant davlatlarga bog‘liqlikni kuchaytirmoqda.

Otabek Bakirov, iqtisodchi.

Avvalroq O‘zbekistonning yanvar–iyul oylaridagi tashqi savdo aylanmasi tarkibi e’lon qilingandi. Mazkur davrda mamlakat eksporti hajmi 11,3 milliard dollarni, importi 16,8 milliard dollarni tashkil etgan.