Ўзбекистон Ташқи ишлар вазирлигида Италия элчиси Агостино Пинна билан учрашув бўлиб ўтди, деб хабар бермоқда «Дунё» АА.
Маълумотга кўра, учрашувда сиёсий, савдо-иқтисодий, маданий-гуманитар, таълим ва бошқа соҳалардаги ҳамкорликни мустаҳкамлаш ва кенгайтиришнинг долзарб масалалари муҳокама қилинди. Шунингдек, 25 сентябрь куни Италияда бўлиб ўтган парламент сайловлари ва янги Италия ҳукуматини шакллантириш жараёни юзасидан фикр алмашилди.
Томонлар Савдо-иқтисодий, саноат ҳамкорлиги ва экспорт кредитлари бўйича ҳукуматлараро ишчи гуруҳининг 7-йиғилишини яқин келажакда Тошкент шаҳрида ташкил этиш юзасидан фикр алмашди. Бундан ташқари, томонлар Ўзбекистон ва Италияда итальян ҳамда ўзбек тили ва маданиятига ўзаро қизиқиш кучайиб бораётганини юқори баҳолади.
Шу нуқтаи назардан, 2023 йилда Ўзбекистон ва Италиянинг етакчи университетлари ректорларининг йиллик форумини ташкил этиш, рақамли иқтисодиёт, муҳандислик, саноат дизайни, агросаноат ва туризм соҳаларида мутахассисларни биргаликда тайёрлаш масаласини ўрганишга келишиб олинди.
Учрашув якунлари бўйича келгуси йилнинг биринчи ярмида Ташқи ишлар вазирликлариаро сиёсий маслаҳатлашувларнинг навбатдаги раундини ўтказиш саналарини ишлаб чиқиш, шунингдек, яқин келажакда маданий тадбирларни ташкил этиш бўйича келишувларга эришилди.
Изоҳ (0)