Европа Иттифоқининг 27 давлати ташқи ишлар вазирлари Арманистон ва Озарбайжон чегарасига фуқаролик миссиясини юбориш бўйича келишиб олди. Бу ҳақда ЕИ кенгаши баёнотига таяниб, Anadolu хабар бермоқда.
«Бугун Кенгаш Озарбайжон билан халқаро чегаранинг Арманистон томонига Европа Иттифоқининг 40 нафаргача экспертини юборишга қарор қилди. Уларга минтақадаги вазиятни кузатиш, таҳлил қилиш ва ҳисобот бериш вазифаси юклатилади», — дейилади баёнотда.
Тегишли қарор Арманистон, Озарбайжон ва Франция раҳбарлари ҳамда Европа кенгаши раҳбарининг 6 октябрь куни Прагада бўлиб ўтган учрашувидан сўнг қабул қилинди. Миссия «ҳудудда тинчлик ва хавфсизликни тиклашга кўмаклашиш, ишончни мустаҳкамлаш ва икки давлат ўртасидаги халқаро чегарани делимитация қилиш»га қаратилган бўлади.
Прагадаги учрашувда Арманистон ва Озарбайжон сентябрь ойидаги можародан сўнг бир-бирининг ҳудудий яхлитлигини ва суверенитетини тан олган эди.
Арманистон ва Озарбайжон ўртасидаги зиддият
Ереван ва Баку ўртасида навбатдаги кескинлик 12 сентябрдан 13 сентябрга ўтар кечаси бошланди. Арманистон Озарбайжонни жануби-шарқий чегарани ўққа тутишда айблади. Ўз навбатида, Боку ҳам Арманистон томондан Озарбайжон армиясининг таъминот йўллари миналангани, шунингдек, ўт очилганини даъво қилди.
13 сентябрь тонгида томонлар Москва воситачилигида ўт очишни тўхтатишга келишди, аммо отишмалар тўхтамади ва икки мамлакат ҳам бунда қарши тарафни айблади. 14 сентябрь оқшомида томонлар тинчлик бўйича яна бир бор келишувга эришди.
Арманистон КХШТдан ёрдам сўради, бироқ улар тинчликпарвар кучларни юборишдан бош тортди. КХШТ Арманистонга ўз миссиясини жўнатди, 19 сентябрь куни гуруҳ низони тинчлантириш учун таклифлар ишлаб чиққанини маълум қилди.
Изоҳ (0)