Германияда энергия инқирози туфайли тез орада шифохоналар ёпилиши мумкин, деди Германия соғлиқни сақлаш вазири Карл Лаутербах РНД нашрига берган интервьюсида.
Вазир Россия энергетика ресурсларининг етказиб берилишидаги узилишлар туфайли юзага келган муаммолар барча ижтимоий объектлар, жумладан, шифохоналарни хавф остига қўйиши мумкинлигини таъкидлади.
«Агар тез ва кескин тарзда жавоб бермасак, шифохоналар ёпилади», — деди у.
Лаутербахнинг маълумотларига кўра, 2022 ва 2023 йилларда ижтимоий соҳани молиялаштиришдаги бўшлиқ тахминан 15 миллиард еврони ташкил қилади. Бундай шароитда давлат барча муҳтож корхона ва ташкилотларни қўллаб-қувватлай олмайди, деб таъкидлади вазир.
Россиянинг Украинадаги босқини бошланганидан кейин Европага Россия газини етказиб бериш қисқарди. Баҳорда Европанинг баъзи давлатлари газ учун рублда ҳақ тўлашдан бош тортган, бошқалари эса Германияга асосий экспорт йўналиши бўлган «Шимолий оқим 1» қувури орқали газ етказиб беришнинг тўхтатилиши ва қисқариши натижасида ёнилғини олишни тўхтатган.
Изоҳ (0)