Президент матбуот котиби Шерзод Асадов иштирокида 17 октябрь куни ўтказилган брифингда Шавкат Мирзиёевнинг ҳафталик иш графиги ҳақида маълумот берилди, деб хабар бермоқда «Дарё» мухбири.
Шерзод Асадовнинг айтишича, бу ҳафтада ҳам давлат раҳбари иштирокларида қатор тадбирлар бўлиб ўтади.
«Бугун куннинг биринчи ярмида президентимиз ҳузурларида қурилиш лойиҳалари тақдимоти ўтказилди. Унда Тошкент шаҳрида 2025 йилда Ёшлар ўртасидаги Осиё ўйинларини ўтказиш учун қурилаётган Олимпия шаҳарчаси, Паркент туманида туризмни ривожлантириш ҳамда Термиз шаҳридаги зиёратгоҳларни ободонлаштириш лойиҳалари кўриб чиқилди.
Куннинг иккинчи ярмида маҳаллаларнинг инфратузилмаси ривожига ажратилган маблағларнинг сарфланишини назорат қилиш механизмлари ҳамда алоҳида топшириқлар ижроси юзасидан мутасадди раҳбарлар, хусусан бош прокурор давлат раҳбарига ҳисобот беради», — дейди Шерзод Асадов.
Шунингдек, мазкур иш ҳафтаси давомида маъмурий ислоҳотларни амалга ошириш ҳамда қишлоқ хўжалиги стратегиясида белгилаб берилган вазифалар ижросига оид муҳокамалар режалаштирилган.
20—21 октябрь кунлари президент давлат ташрифи билан Туркманистонда бўлади. Ташриф давомида икки мамлакат раҳбарларининг тор ва кенгайтирилган таркибдаги музокаралари бўлиб ўтади, уларнинг якунида салмоқли, биринчи навбатда савдо-иқтисодий ҳамкорликка оид ҳужжатлар тўплами имзоланади.
Бундан ташқари, президентлар Ашхобод шаҳрида барпо этилган «Тошкент» боғинининг тантанали очилиш маросимида иштирок этади ҳамда Ўзбекистон—Туркманистон чегараолди савдо зонасини ташкил этиш бўйича қўшма лойиҳани амалга ошириш ишларига старт беради.
Изоҳ (0)