SpaceX ва Tesla компаниялари асосчиси Илон Маск Россия ядро ракеталари билан 30 дақиқа ичида АҚШ ва Европани бутунлай вайрон қила олиши ҳақида ёзди.
«Россияда АҚШ ва Европани ядро ракеталари билан 30 дақиқада вайрон қилиш учун имконият бор ва аксинча», — деб ёзди миллиардер ўз Twitter’ида. «Ҳайратланарли даражада кўп одамлар буни билмайди. Албатта, уларни қўллаш тентаклик бўлган бўларди, лекин, умуман, бундай вазиятда бўлишнинг ўзи тентакликдир», — дея қўшиб қўйди у.
Ушбу постни у НАТО 17 октябрь, душанба куни B-52 бомбардимончилари иштирокида ядровий машғулотларни бошлаши ҳақидаги хабарни Twitter’га жойлаган ва у ҳолда «вазият ядровий Армагеддонгача бориб етиши» ҳақида фикр билдирган фойдаланувчи, канадалик бизнесмен Александр Торвиллнинг постига жавобан ёзди.
Шунингдек, у оқилона фикрлайдиган ҳеч бир одам ядро урушини бошламаслигини қайд этди. «Бу мантиқ билан боғлиқ муаммо шундаки, агар биз айтаётган одамлар оқил бўлганида, биринчи ўринда урушнинг ўзи бўлмасди», — деди у.
Илон Маск Украинадаги урушга қандай муносабатда?
3 октябрь куни Илон Маск Россия ва Украина ўртасида тинчликка эришиш учун ўзининг тўрт бандли сценарийсини таклиф қилганди, улардан бирига кўра Қрим Россияники деб тан олиниши керак. Кремль унинг ғояларини ижобий деб баҳолади, Киев эса тадбиркорни танқид қилди. Маск Украинани қўллаб-қувватлашини, лекин жаҳон урушини истамаслигини айтди. Сиёсатшунос Ян Бреммернинг таъкидлашича, Илон Маск можарони ҳал қилиш режасини эълон қилишдан олдин Владимир Путин билан гаплашган. Кремль ҳам, тадбиркорнинг ўзи ҳам буни рад этди.Маскнинг «режа»сини изоҳлар экан, Украина собиқ элчиси Андрей Мельник унга нисбатан сўкиниш иборасини қўллади ва «туёғини шиқиллатиш»ни маслаҳат берди.
Америкалик миллиардер эса шундан кейин Украина учун Starlink интернетини молиялаштиришни тўхтатишга қарор қилди.
Мавзуга доир:
Изоҳ (0)