«Автозак» нашри мухбирлари ҳуқуқни ҳимоя қилиш ташкилотлари маълумотларини таҳлил қилиб чиқиб, «Вагнер» хусусий ҳарбий компанияси ва Россия Мудофаа вазирлиги «ёлловчилари» бутун мамлакат бўйлаб 15 130 нафар маҳбусни урушга олиб кетганини аниқлади.
Энг кўп ҳолатлар Ростов ва Брянск вилоятларида ҳамда Мордовия республикасида қайд этилган. «Ёлловчилар» фақат марказий Россия ва Уралдаги колонияларда бўлган.
Маҳкумлар ва уларнинг қариндошлари берган маълумотларга кўра, ахлоқ тузатиш колонияларининг кўпчилигига Евгений Пригожиннинг шахсан ўзи етиб келиб, урушга боришни тарғиб қилган. «Ёлловчилар» маҳбуслар қаршисида сўзлаган нутқлар мутлақо бир хил бўлган.
«Маҳбуслар қандай асослар билан колониялардан эшелон-эшелон қилиб олиб чиқилаётгани ва ноқонуний қуролли гуруҳлар томонида туриб жанг қилишга юборилаётганини ҳуқуқ ҳимоячилари тушунмаяпти», — дейилади хабарда.
Аввалроқ Россия Мудофаа вазирлиги Украина билан урушга маҳбусларни ҳам жалб қилишни бошлагани, улардан «Шторм» махсус отряди тузилаётгани, унинг таркибига ҳуқуқни муҳофаза қилиш органларининг маҳкум ходимлари кираётгани хабар берилганди.
ОАВларда июль бошида Вагнер хусусий ҳарбий компанияси Россия колонияларидаги маҳбусларни ёллаётгани ҳақида хабарлар пайдо бўла бошлади. Компания вакиллари мамлакатнинг 13 та минтақасидаги 21 та колонияда боргани хабар қилинган.
«Медиазаона» маълумотларига кўра, маҳбуслар орасида ташвиқот олиб бориш учун бизнесмен Евгений Пригожиннинг шахсан ўзи ҳам борган, у Вагнер хусусий ҳарбий компанияси эгаси ҳисобланади. Жанговар ҳаракатларда қатнашиш эвазига маҳбусларга 100 минг рубль маош, мукофот пуллари, улар ҳалок бўлган тақдирда, оилаларига тўловлар, шунингдек, якунда аминистия ваъда қилинган.
Вагнер гуруҳи ўзи қандай гуруҳ?
Вагнер гуруҳи биринчи марта Украинада 2014 йилда пайдо бўлган ва Россиянинг Қримни эгаллаб олишида муҳим роль ўйнаган эди.Унга махсус топшириқли бўлинма собиқ жангчиси Дмитрий Валерьевич Уткин асос солган деб ҳисобланади, у гуруҳга Гитлернинг севимли композитори Ричард Вагнернинг номини берган.
Кўплаб Ғарб ОАВлари Вагнер гуруҳи тўғридан-тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.
Изоҳ (0)