Саудия Арабистони Украинага 400 млн долларлик гуманитар ёрдам ажратди

Саудия Арабистони ҳукумати Украинага 400 миллион долларлик қўшимча гуманитар ёрдам пакети ажратишга қарор қилди, Украина президенти Владимир Зеленский қироллик бош вазири, валиаҳд шаҳзода Муҳаммад бин Салмон билан телефон суҳбати чоғида унга бунинг учун миннатдорлик билдирди, деб ёзади «РБК».

Шунингдек, Зеленский Саудия Арабистони БМТ Бош ассамблеясида Донбасс республикалари, Запорожье ва Херсон вилоятларининг Россияга қўшилиши ҳақидаги референдумларни тан олишдан бош тортиш бўйича резолюцияни қўллаб-қувватлаганини ҳам тилга олди. Ўшанда уни ёқлаб 143 та мамлакат овоз берган, бештаси қарши чиққан, 35 та давлат эса овоз беришда қатнашмаганди.

Ўз навбатида, бин Салмон низони ҳал қилишда иштирок этишини айтди ва Саудия Арабистони воситачилик саъй-ҳаракатларини давом эттиришга тайёрлигини таъкидлади.

Аввалроқ АҚШ ҳукумати Саудия Арабистонини ОПЕК+ (Нефть экспорт қилувчи давлатлар ташкилоти) мамлакатлари билан бирга қабул қилинган қарор учун танқид қилганди.

5 сентябрь куни ОПЕК+ давлатлари нефть қазиб олишни ноябрь ойидан бошлаб кунига 2 миллион баррелга қисқартиришга келишиб олди. АҚШ президенти Жо Байден, ўз навбатида, нефть қазиб олиш квоталари қисқартириш қароридан ҳафсаласи пир бўлганини билдирди ва АҚШ эҳтимолий жавоб чораларини ўрганаётгани ҳақида огоҳлантирди.

Кейинроқ АҚШ Давлат котиби Энтони Блинкен Вашингтон ОПЕК мамлакатлари қарорига жавоб беришнинг турли вариантларини, жумладан Саудия Арабистони билан муносабатларни ҳам кўриб чиқаётганини айтди.

АҚШ Конгресси аъзолари ОПЕК+ мамлакатларининг нефть қазиб олишни қисқартириш ҳақидаги қарори фонида Саудия Арабистонига қурол сотишни тўхтатишни таклиф қилди.