Россия Қрим кўпригини 2023 йилнинг июлигача қайта тиклашни режалаштирмоқда

Россия портлаш юз берган Қрим кўпригини 2023 йилнинг 1 июлигача таъмирдан чиқаришни режалаштирмоқда. Тегишли буйруқ Россия ҳукумати томонидан чиқарилган, деб ёзади россиялик ОАВ 14 октябрь, жума куни. «Ишларни якунлаш учун тузилаётган давлат шартномаларининг муддати 2023 йил 1 июлгача, деб белгилансин», — дейилади қарорда.

Кўприкни таъмирлашда ягона пудратчи сифатида «Нижнеангарсктрансстрой» компанияси танланган.

Қрим кўпригида 8 октябрь куни тонгда юк машинаси портлаб кетди. Портлаш туфайли шу пайт кўприкнинг темир йўл қисмида ҳаракатланаётган юк поездининг ёнилғи ортилган цистерналари ёниб кетди. Оқибатда 4 киши ҳалок бўлди, шунингдек, кўприкнинг автомобиль йўли қисмида учта таянч устуни оралиқлари қулаб тушди.

Россия жавоб қайтаришга ваъда берди

Қрим кўпригидаги портлашдан кейин Россия Тергов қўмитаси терроризм ҳақида иш очди, мамлакат президенти Владимир Путин воқеада Украина махсус хизматларини айблади. «Шубҳасиз, бу Россия Федерациясининг ўта муҳим фуқаролик инфратузилмасини вайрон қилишга қаратилган терактдир, — деди Путин. — Муаллифлар, ижрочилар, буюртмачилар — Украина махсус хизматлари». Қрим кўпригидаги портлаш ва ёнғин қўпорувчилик ва террорчилик ҳаракати ҳисобланади, унинг ортида эса «криминал Киев режими» турибди, уларни «йўқ қилиш» керак, деди Россия собиқ президенти, Хавфсизлик кенгаши раиси ўринбосари Дмитрий Медведев.

«Россиянинг ушбу жиноятга жавоби фақат террорчиларни бевосита йўқ қилиш бўлиши мумкин. Бутун дунёда айнан шундай қилинади. Россия фуқаролари айнан шуни кутмоқда», — дея фикр билдирди Медведев.

Украина шаҳарлари бомбардимон қилинди

10 октябрь куни Россия Украина бўйлаб аёвсиз ракета зарбаларини берди. Украина шаҳарларига 80 дан ортиқ ракета ташланган, уларнинг ярми ҳаво ҳужумидан мудофаа тизимлари томонидан уриб туширилган. Украина расмийларининг хабар беришича, Киевнинг ўққа тутилиши оқибатида камида саккиз нафар тинч аҳоли ҳалок бўлган.

Россия президенти Владимир Путин Украина шаҳарларининг ўққа тутилиши Қрим кўпригида содир бўлган портлашга жавоб бўлганини айтди. Бироқ Украина президенти офиси маслаҳатчиси Михаил Подоляк ракета зарбалари Қрим кўпригидаги портлашга алоқаси йўқлигини таъкидлади. «Россия армиясининг Украина шаҳарларига йўналтирилган бугунги ракета зарбалари бир неча ҳафта олдин режалаштирилган ва Қрим кўпригидаги портлаш билан боғлиқ эмас», — деди Подоляк.