Жорий йилнинг 11—12 октябрь кунлари Тошкент вилояти ҳокимлиги ва Олмалиқ кон-металлургия комбинати ҳамкорлигида Олмалиқ шаҳридаги ОКМК спорт мажмуасида Тармоқлараро саноат ярмаркаси ташкил этилди. Ярмарка доирасида илм фан ва инновацион технологиялар маҳсулотлари кўргазмаси ҳам намойиш қилинди.
Тадбирда жами 300дан зиёд маҳаллий ишлаб чиқарувчилар, улардан 62таси ўзлаштирилган 1000дан ортиқ ўз маҳсулотларини акс эттирувчи стендлари билан иштирок этишди.
Шунингдек, комбинат томонидан импорт қилинадиган 2500 дан ортиқ маҳсулотлар кўргазмаси ҳам намойиш этилди.
Ярмарка давомида B2B форматида учрашувлар ташкил этилиб, унда ОКМК техник талабларига жавоб бера оладиган маҳаллийлаштирилган маҳсулотларни ўзлаштириш билан боғлиқ масалалар муҳокама этилди ва 2026 йилгача маҳаллийлаштириш дастури доирасида инновацион лойиҳалар, илмий соҳадаги ихтиролар, ўзлаштирилган маҳсулотлар ва маҳаллийлаштирилган маҳсулотларнинг янги турларини чиқариш бўйича тақдимотлар ўтказилди.
Таъкидлаб ўтиш лозимки, ярмаркада ОКМК томонидан маҳаллий ишлаб чиқарувчилар билан 326 турдаги маҳсулотларни ўзлаштириш бўйича 961,7 млрд сўмлик меморандумлар имзоланди.
Комбинат вакиллари томонидан тақдим этилган маълумотларга кўра, ўтган 2021 йил давомида маҳаллийлаштириш Дастурига асосан 87 та лойиҳа доирасида 217,2 млрд сўмлик маҳсулот ишлаб чиқарилиб, режа 134,6 фоизга бажарилган.
Жорий йилнинг январь—сентябрь ойларида маҳаллийлаштириш Дастури доирасида 222,7 млрд.сўмлик маҳсулот ишлаб чиқарилиб, режа эса 130 фоизга бажарилди ва ўтган йилнинг мос даврига нисбатан 149,7 фоизни ташкил этди.
9 ойда маҳаллийлаштириш Дастурига қўшимча равишда жорий йилда 11 та янги лойиҳаларнинг тармоқ жадвали тасдиқланиб ишлаб чиқариш бошланди. Жумладан,«Қаттиқ қотишмали маҳсулотлар - парма ва кескичлар», «Тош майдалаш тегирмони қопламаси», «Юқори ҳароратга чидамли керамик маҳсулотлар», «Вольфрам ангидриди», «Янчиш ускунасининг зирҳлари», «Қуйма маҳсулотлар» ва бошқалар.
Жорий йил якунигача маҳаллийлаштириш Дастури доирасида 320,0 млрд.сўмлик маҳсулот ишлаб чиқариш таъминланади,бу ўтган йилнинг мос даврига нисбатан 147,3 фоизни ташкил этади.
Маҳаллий ишлаб чиқарувчиларни қўллаб-қувватлаш, саноат кооперациясини алоқаларини ривожлантириш доирасида ҳамда импорт ҳажмини қисқартириш мақсадида жами 1,1 трлн сўмлик маҳсулотларни харид этиш бўйича шартномалар тузилган, шундан кооперация портали орқали жами 727,3 млрд сўмлик шартномалар имзоланди.
Импорт маҳсулотлари ҳажмини мақбуллаштириш бўйича тармоқлараро саноат кооперацияси алоқаларини кенгайтириш натижасида ҳисобот даврида 65,2 млн долларга импорт ҳажмлари қисқартирилди. Йил якунига қадар эса 88,1 млн долларга қисқартирилиши кутилмоқда, — деб маълумот берди ОКМК Маҳаллийлаштириш бўлими бошлиғи Дилшодбек Холдаралиев.
ОКМК илм-фанни ишлаб чиқаришга интеграциясига ҳам алоҳида эътибор қаратмоқда. Ушбу йўналишда амалга оширилган ҳаркатлар натижасида бир қатор янги турдаги маҳсулотлар ишлаб чиқарилишига эришилди. Жумладан, 2019 йилда палладий, 2021 йилда рений, 2022 йилда молибден металли соф ҳолда олинди. 2022 йилнинг июль ойида эса платина металлини ишлаб чиқариш технологияси учун муаллифлик ҳуқуқи қўлга киритилди. Бугунги кунда ОКМК 7 та маҳсулот ишлаб чиқариш технологиясига оид муаллифлик ҳуқуқини қўлга киритган.
Бундан ташқари, 2022—2026 йиллар мобайнида 6та 6500,0 млн сўмлик «драйвер» инновацион лойиҳаларни амалга ошириш белгиланган. Шунингдек, қарорда 2022-2023 йиллар мобайнида республикамизнинг тадқиқот институтлари томонидан амалга ошириладиган 9 459,4 млн сўмлик инновацион тадқиқот ишларини бошқа корхоналар билан биргаликда молиялаштириш ишлари кўзда тутилган. Ҳозирда 3 919,4 млн сўмлик 9 та илмий-тадқиқот ишлари молиялаштирилган.
Маълумотлар шериклик ҳуқуқи асосида тайёрланди
Изоҳ (0)