Ҳиндистон ҳукумати Maiden Pharmaceuticals компаниясига қарашли заводда йўталга қарши сироп ишлаб чиқаришни тўхтатди — сироп Гамбияда 69 га яқин боланинг ўлимига сабаб бўлган бўлиши мумкин, деб ёзмоқда Deutsche Welle.
Ҳиндистон соғлиқни сақлаш идоралари Maiden Pharma компаниясининг асосий заводида барча дориларни ишлаб чиқаришни тўхтатди. Ҳиндистон шимолидаги Ҳаряна штати ички ишлар вазири Анил Вижнинг таъкидлашича, расмийлар бу ойда заводни тўрт марта текширган ва 12 та бузилишни аниқлаган.
«Буни ҳисобга олган ҳолда компаниядаги барча ишлаб чиқаришлар тақиқланди ва билдиришнома берилди», — деди Виж.
Maiden Pharma ўз маҳсулотларини ички бозорда сотади, шунингдек, Осиё, Африка ва Лотин Америкасига экспорт қилади. Ҳаряна штатида компаниянинг яна иккита ишлаб чиқариш заводи мавжуд.
Ўтган ҳафта Жаҳон соғлиқни сақлаш ташкилоти (ЖССТ) Maiden Pharma томонидан ишлаб чиқарилган шамоллаш ва йўталга қарши сироплар Гамбияда камида 66 нафар боланинг ўлимига алоқадор бўлиши мумкинлиги ҳақида ҳисобот эълон қилганди.
ЖССТнинг таъкидлашича, тўртта Маiden маҳсулотининг лаборатория таҳлили уларда буйракларга жиддий зарар етказиши мумкин бўлган ва ҳаёт учун хавфли ифлослантирувчи моддалар мавжудлигини кўрсатган.
Фармацевтика компанияси директори ҳинд матбуотининг айбловларини рад этди.
Изоҳ (0)