Shimoliy Koreya yetakchisi Kim Chen In uzoq masofali qanotli raketalarni sinovdan o‘tkazishga shaxsan boshchilik qildi. Bu haqda Reuters xabar berdi.
Shimoliy Koreya rahbari mamlakat “yadroviy strategik qurolli kuchlari ko‘lamini kengaytirishda davom etishi” kerakligini ta’kidladi. Uning tushuntirishicha, bu har qanday muhim harbiy inqirozni istalgan vaqtda ushlab turishga tayyor turish uchun zarur. Bundan tashqari, Kim Chen Inning fikricha, KXDR bu masalada to‘liq yetakchilikni o‘z zimmasiga olmoqda.
Ma’lum qilinishicha, Shimoliy Koreyaning ikkita raketasi 2000 kilometr masofadagi nishonga aniq zarba bergan. Ularning ishga tushirilishi qurollarning jangovar samaradorligi va kuchini yanada oshirishga, xususan, “operativ foydalanishning butun tizimi ishonchli va texnik xavfsiz ekanini” tasdiqlashga qaratilgan edi.
Avvalroq Kim Chen In taktik yadro bo‘linmalarining harbiy tayyorgarligini ko‘zdan kechirgan edi. Xabarlarga ko‘ra, Kim Chen In AQSH va Janubiy Koreya bilan muzokaralar olib borishdan manfaatdor emasligini ochiq aytgan.
“Bizda dushmanlar bilan muloqot qilish uchun asos yo‘q, bunga ehtiyoj ham sezmayapmiz”, — deya uning so‘zlarini keltiradi OAV.
Koreya yarim orolidagi keskinlik oxirgi paytlarda kuchaydi. Pxenyan sentabr oyi oxiridan beri Janubiy Koreya va AQSHning harbiy mashg‘ulotlariga javoban muntazam ravishda ballistik raketa uchirmoqda. Shuningdek, Shimoliy Koreya yaqin kelajakda yadroviy sinov o‘tkazishi mumkinligidan xavotirlar kuchaymoqda.
Izoh (0)