Ўзбекистоннинг АҚШдаги элчиси Жавлон Ваҳобов академик алоқаларни мустаҳкамлаш борасидаги ишлар доирасида Техас «А&М» (Техаs А&М) университети ҳузуридаги Жорж Буш номидаги ҳукумат ва давлат хизмати мактабининг катта декани Фрэнк Эшли билан учрашди, деб хабар бермоқда «Дунё» АА.
Маълум қилинишича, суҳбат чоғида Ўзбекистондаги ихтисослаштирилган олий ўқув юртлари билан академик алоқаларни йўлга қўйиш, шунингдек, ўзаро делегациялар алмашувини ташкил этиш орқали давлат хизматчиларини тайёрлаш ва уларнинг малакасини ошириш тизимини такомиллаштириш жараёнига Америка томонини жалб этиш истиқболлари муҳокама қилинди.
Америка томонига Ўзбекистонда ҳар томонлама баркамол, ижодий фикрлайдиган раҳбар ва давлат хизматчилари тайёрлашга қаратилаётган алоҳида эътибор, шунингдек, давлат бошқаруви, кадрлар сиёсати, кадрлар тайёрлаш, қайта тайёрлаш ва малакасини ошириш соҳасидаги тизимли ўзгаришларнинг самаралари ҳақидаги маълумотлар тақдим этилди.
Фрэнк Эшли, ўз навбатида, Ўзбекистоннинг замон талабига жавоб берадиган янги авлод кадрларини тайёрлаш бўйича жаҳондаги илғор тажрибани жорий этишга интилиши, шубҳасиз, мамлакатнинг узоқ муддатли ва барқарор ривожланишга сезиларли ва ижобий таъсир кўрсатишини айтди. Шу нуқтаи назардан, Америка томони фуқаролар билан алоқа ўрнатишнинг замонавий усулларини жорий этиш, давлат органлари томонидан аҳолини хабардор қилишнинг илғор технологияларидан фойдаланиш зарурлигига эътибор қаратди.
Жорж Буш мактаби раҳбарияти Ўзбекистон олий ўқув юртлари ва кафедралари билан ихтисослаштирилган йўналишлар бўйича икки даражали таълим тизимини жорий этиш, Ўзбекистон давлат хизмати вакиллари учун АҚШда қисқа муддатли, ўрта муддатли ва магистратура таълими дастурларини ташкил этиш каби йўналишларда ҳамкорлик қилишга тайёр эканликларини маълум қилди.
Мактаб ўқитувчилари ва ўқувчиларнинг тажриба алмашиш учун республикага ташрифини ташкил этиш, давлат бошқарувининг энг янги услублари асосида қўшма дастур ва курслар ишлаб чиқиш имкониятлари қайд этилди.
Буш мактаби 1997 йилда АҚШнинг 41-президенти Жорж Бушнинг «давлат хизмати — олийжаноб даъват» тамойилига мувофиқ ташкил этилган. Ушбу таълим муассасаси бошқарув кадрларини тайёрлаш соҳасидаги энг яхши университетлардан бири ҳисобланади. Буш мактабида Барак Обама, Пан Ги Мун, Арнольд Шварценеггер, Кондолиза Райс, Тед Кеннеди, Гельмут Коль, Дик Чейни, Колин Пауэлл каби машҳур етакчи ва арбоблар маъруза қилади.
Изоҳ (0)