Қамчиқ довонида Volvo юк машинаси қарама-қарши йўналишга чиқиб кетиб, 5 ва 8 тонналик Isuzu юк машиналари билан тўқнашди. Бу ҳақда ФВВ матбуот хизмати хабар берди.
Маълум қилинишича, 11 октябрь куни соат 05:45 да А-373 Тошкент—Ўш халқаро автомобиль йўлининг Қамчиқ довони қисмида Водий—Тошкент йўналишида ҳаракатланиб кетаётган Volvo юк машинаси ҳайдовчиси кутилмаганда бошқарувни йўқотиб, қарама-қарши йўналишга чиқиб кетган ва 5 ҳамда 8 тонналик Isuzu юк машиналари билан тўқнашган.
Йўл-транспорт ҳодиссаси оқибатида 8 тонналик Isuzu юк машинасида ёнғин келиб чиққан.
Зудлик билан воқеа жойига ФВВининг «Қамчиқ» Махсус қидирув, ёнғин-қутқарув бошқармаси қутқарувчилари ва ЙПХ ходимлари етиб борган. Қутқарувчилар махсус асбоб-анжомлар ва техникалар ёрдамида ёнаётган машинани соат 06:07 да ўчирган.
Ҳодиса оқибатларини бартараф этишга Фавқулодда вазиятлар давлат қуйи тизимига кирувчи ташкилотлар куч-воситалари ҳам жалб этилган.
Қутқарувчилар томонидан воқеа жойида жабрланган уч нафар юк машиналари ҳайдовчиларига биринчи тиббий ёрдам кўрсатилиб, малакали тиббий ёрдам кўрсатиш учун шифохонага юборилган. Ҳодиса оқибатида ҳалок бўлганлар йўқ
Изоҳ (0)