6 октябрь куни Тошкент шаҳрида аввалдан кузатувга олинган юк машинасидан пиротехника воситалари топилди. Бу ҳақда Давлат божхона қўмитаси «Дарё»га маълум қилди.
Қайд этилишича, «Тошкент-Аэро» ихтисослаштирилган божхона комплексининг Контрабандага қарши кураш бўлими ходимлари томонидан Давлат хавфсизлик хизмати билан ҳамкорликда ўтказилган навбатдаги тезкор тадбирда олдиндан кузатувга олинган шахс бошқарувидаги Isuzu юк автотранспорт воситаси тўхтатилиб, кўздан кечирилган. Юкхонадаги кетмон дасталари ортига яширилган қоғоз қутилар тезкор ходимларнинг эътиборини тортган.
Қоғоз қутилар очиб кўрилганида эса уларнинг ичида 5 турдаги 77 272 дона пиротехника воситалари борлиги аниқланган.
Дастлабки ҳисоб-китобларга кўра, хорижда ишлаб чиқарилган, аммо, сифатини ва божхона расмийлаштирувини тасдиқловчи ҳужжатлари бўлмаган мазкур салют ва петардаларнинг жами қиймати 433 миллион сўмни ташкил қилмоқда.
Шунингдек, юкхонада муқаддам ноқонуний равишда олиб кирилган 28 минг 640 дона лекопластир ва термометрлар ҳам борлиги аниқланган. Уларнинг умумий қиймати 146 миллион сўмдан ошмоқда.
Бундан ташқари, товарлар орасида 41 минг 488 дона шахсий гигиена ва парфюмерия воситалари борлиги аниқланган. 116 миллион сўмдан ошиқ қийматдаги мазкур товарларнинг қадоғида ҳам уларнинг ишлаб чиқарилган жойи, муддати ҳақида ва бошқа зарурий биронта ҳам ахборотлар мавжуд эмас.
Мазкур ҳолатда тўхтатиб қолинган товарларнинг умумий қиймати салкам 696 миллион сўмни ташкил қилмоқда.
Ҳолат юзасидан божхона органлари томонидан терговга қадар текширув ҳаракатлари олиб борилмоқда.
Рақамларга кўра, жорий йилнинг ўтган даври мобайнида республикамиз божхоначилари томонидан ҳуқуқни муҳофаза қилувчи турли идоралар билан ҳамкорликда аниқланган 27 та қонун бузилиш ҳолатларида қиймати 652 миллион 80 минг сўмлик 109 минг 168 дона пиротехника воситаларининг ноқонуний олиб ўтилишининг ўз вақтида олди олинган.
Изоҳ (0)