Qamchiq dovonida Volvo yuk mashinasi qarama-qarshi yo‘nalishga chiqib ketib, 5 va 8 tonnalik Isuzu yuk mashinalari bilan to‘qnashdi. Bu haqda FVV matbuot xizmati xabar berdi.
Ma’lum qilinishicha, 11-oktabr kuni soat 05:45 da A-373 Toshkent—O‘sh xalqaro avtomobil yo‘lining Qamchiq dovoni qismida Vodiy—Toshkent yo‘nalishida harakatlanib ketayotgan Volvo yuk mashinasi haydovchisi kutilmaganda boshqaruvni yo‘qotib, qarama-qarshi yo‘nalishga chiqib ketgan va 5 hamda 8 tonnalik Isuzu yuk mashinalari bilan to‘qnashgan.
Yo‘l-transport hodissasi oqibatida 8 tonnalik Isuzu yuk mashinasida yong‘in kelib chiqqan.
Zudlik bilan voqea joyiga FVVining “Qamchiq” Maxsus qidiruv, yong‘in-qutqaruv boshqarmasi qutqaruvchilari va YPX xodimlari yetib borgan. Qutqaruvchilar maxsus asbob-anjomlar va texnikalar yordamida yonayotgan mashinani soat 06:07 da o‘chirgan.
Hodisa oqibatlarini bartaraf etishga Favqulodda vaziyatlar davlat quyi tizimiga kiruvchi tashkilotlar kuch-vositalari ham jalb etilgan.
Qutqaruvchilar tomonidan voqea joyida jabrlangan uch nafar yuk mashinalari haydovchilariga birinchi tibbiy yordam ko‘rsatilib, malakali tibbiy yordam ko‘rsatish uchun shifoxonaga yuborilgan. Hodisa oqibatida halok bo‘lganlar yo‘q
Izoh (0)