Ғарб экспертлари орасида тренд кузатилмоқда — улар йил охиригача уруш тугаб, Украина 24 февралгача бўлган чегараларига қайтишига умид қилмоқда. Бу ҳақда The Times мақола эълон қилди.
Журналистлар британиялик юқори мансабли амалдорнинг гапларини келтириб ўтмоқда, у воқеаларнинг айнан шундай ривожланишини тахмин қилмоқда — лекин фақат қарши ҳужум ҳозирги суръатларда давом этган тақдирдагина.
Худди шундай фикрни АҚШнинг Европадаги кучлари собиқ қўмондони Бен Ходжес ҳам айтиб ўтди. «Ўзимиз гувоҳ бўлаётган вазиятдан келиб чиқиб, камида Донбассда инқироз юз беришини кутяпмиз, ва мен ишонаманки, йил охиригача россияликлар 23 февраль ҳолатидаги чегаралардан нарига суриб чиқарилади. Бу мағлубиятга учраган армия. Агар улар буни амалга оширса, очиқ гапирадиган бўлсак, Қримдаги истилочилар қопқонга тушади», — деди у.
Аввалроқ Буюк Британия Мудофаа вазирлиги Украина ҳам шимоли-шарқий, ҳам жанубий фронтлардаги ҳужум операцияларида муваффақиятларга эришишда давом этаётганини маълум қилганди.
Украина ҳарбийлари Россия қўшинлари томонидан эгаллаб олинган Херсон вилоятида яна саккизта аҳоли пунктини озод қилгани ҳақида Украина президенти Владимир Зеленский айтиб ўтганди.
Шу ҳафта Херсон вилоятидан ташқари, Харьков, Луганск ва Донецк вилоятларидаги шаҳар ва қишлоқлар ҳам «Россиянинг сохта референдумидан озод этилди», деди Зеленский. Унинг сўзларига кўра, гап озод қилинган ўнлаб аҳоли пунктлари ҳақида бормоқда.
Шунингдек, президент маълум қилишича, Украина армияси мамлакат жанубида «анча тез ва шиддатли тарзда» олға кетишда давом этмоқда.
4 октябрь куни Украина президенти офиси раҳбари ўринбосари Кирилл Тимошенко Донецк, Луганск, Николаев, Харьков ва Херсон вилоятларида 1534 та аҳоли пункти озод этилиб бўлганини маълум қилди. Ўз навбатида, Украина ички ишлар вазири ўринбосари Евгений Енин Херсон вилоятининг ўзида 50 та аҳоли пункти озод қилинганини айтди.
Шу куни Россия Мудофаа вазирлиги Украинадаги жанговар ҳаракатлар харитасини намойиш қилди, унга кўра, Херсон вилоятида фронт чизиғи тахминан 30 километрга жанубга силжиган.
Изоҳ (0)