Қирғизистон Мудофаа вазирлиги КХШТ (Коллектив хавфсизлик шартномаси ташкилоти) тинчликпарвар кучлари билан «Мустаҳкам биродарлик – 2022» қўмондонлик-штаб ўқув машғулотларини бекор қилди. Машғулотлар октябрь ойида ўтказилиши режалаштирилган эди.
«КХШТ доирасидаги ‘Мустаҳкам биродарлик’ машғулотлари бекор қилинди», — деб хабар берди Қирғизистон Мудофаа вазирлиги матбуот хизмати вакили. У машғулотлар бекор қилингани сабабини айтмади.
Ўқув машғулотлари 10—14 октябрь кунлари Иссиқкўл вилоятининг Балиқчи шаҳрида бўлиб ўтиши керак эди. Уларни кузатиш учун Ўзбекистон, Сербия, Сурия, Туркманистон ва Мўғулистондан вакиллар таклиф қилинганди. Машғулотлар доирасида ўт очишни тўхтатиш режимини таъминлаш масалаларини ишлаб чиқиш режалаштирилган эди.
Маълумот учун, Коллектив хавфсизлик шартномаси ташкилоти таркибига Россия, Арманистон, Беларусь, Қозоғистон, Қирғизистон ва Тожикистон киради.
Изоҳ (0)