Тошкент вилояти ҳокими Зоир Мирзаев оҳангаронлик мурожаатчи Муҳайё Садированинг 30 миллион сўм моддий ёрдам сўраб қилган мурожаатини рад қилди.
Хафа бўлмасангиз, шу мурожаатингизни рад қилинди деб ёзаман. Боиси, яқинда беш миллион сўм моддий ёрдам олган экансиз, — дейди Зоир Мирзаев.
Оҳангарон шаҳар ҳокимининг хотин-қизлар масалалари бўйича ўринбосари, шаҳар Оила ва хотин-қизлар бўлими бошлиғи Шаҳло Исматованинг «Дарё»га маълумот беришича, Муҳайё Садировага куни кеча «Саховат ва кўмак» жамғармасидан 5,5 миллион сўм моддий ёрдам берилган.
Бу пул Муҳайё опанинг соғлиғини тиклаш, даволаниши учун берилганди, — дейди у.
Моддий ёрдам берилгач, яна қўшимча 30 миллион сўм моддий ёрдам бериш жуда мушкул. Шу сабаб вилоят ҳокими Муҳайё опага меҳнатга лаёқатли фарзандлари меҳнат қилиши кераклигини, бунинг учун имконият яратиб берилишини айтди, — дейди Шаҳло Исматова.
Тошкент вилоятининг Оҳангарон шаҳрида бўлиб ўтаётган қабулда Зоир Мирзаев мурожаатчиларнинг аксарияти ёрдам учун фақат пул сўраётганини, ҳоким ёрдамга муҳтож фуқарога 10-12 миллион сўмгача пул бериши мумкинлигини, аммо бундан ортиғи мумкин эмаслигини таъкидламоқда.
Изоҳ (0)