Бош прокуратура ҳузуридаги департамент Жиззах ва Самарқандда пул маблағлари талон-торож қилиниши бўйича аниқланган қонунбузилиш ҳолатлари ҳақида маълумот берди.
Хусусан, департаментнинг Жиззах шаҳар бўлими томонидан ўтказилган терговга қадар текширувда, АТБ «Қишлоқ қурилиш банк»нинг Жиззах минтақавий филиали собиқ бошқарувчиси У.Ю., «З.Б.» МЧЖга жияни О.ни раҳбар сифатида тайинлаб, ушбу МЧЖга юк автотранспорт воситаларини харид қилиш учун 1,5 миллиард сўм кредит ажратилишига эришиб, кейинчалик 1,3 млрд сўмлик транспорт воситаларини бошқа шахсларга сотиб юбориб, кредит маблағларини ўзлаштириш ва растрата қилиш йўли билан талон-торож қилгани аниқланган.
Департаментнинг Каттақўрғон шаҳар бўлими томонидан ўтказилган терговга қадар текширувда, «Н.М.» хусусий корхонаси раҳбари Н.М. ва бошқалар ҳудудий тижорат банки филиалидан эшик, дераза ва мебель ишлаб чиқариш ускуналарини сотиб олиш мақсадида 640 миллион сўм кредит ажратилишига эришиб, ушбу маблағларни мақсадсиз ишлатиб, талон-торож қилгани аниқланган.
Нуробод туман бўлими томонидан ўтказилган терговга қадар текширувда, «Т.Ч.» МЧЖ раҳбари И.Қ. ҳудудий тижорат банки филиалидан МЧЖга ҳамда оила аъзоларига чорва молларини сотиб олиш мақсадида ажратилган 410 миллион сўм кредит маблағини мақсадсиз ишлатиш орқали талон-торож қилгани аниқланган.
Шу каби, департаментнинг Тойлоқ туман бўлими томонидан ўтказилган терговга қадар текширувда, ЯТТ Ш.Д., «О-А.» фермер хўжалиги раҳбари О.У. ва бошқалар ўзаро тил бириктириб, шу туманида яшовчи 10 нафар фуқаро номига картошка уруғи олиш учун жами 237 миллион сўм имтиёзли кредит расмийлаштиришга эришиб, ушбу кредит маблағларини ўз эҳтиёжига ишлатиб юборилгани аниқланган.
Мазкур ҳолатлар юзасидан жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)