“Toshkent hokimligi barcha OAV vakillari bilan ishlashga tayyor va hozirjavob bo‘ladi”. Zoir Mirzayevning matbuot kotibi jurnalistlar bilan muloqot qildi

Toshkent viloyati hokimligi axborot xizmati rahbari Bekzod Qobulov hokimlik va hokimlik mansabdorlari barcha OAV vakillari — jurnalist va blogerlar bilan ishlashga tayyorligini, ular uchun har doim hozirjavob bo‘lishini aytdi.

Zoir Mirzayevning kuni kecha ish boshlagan yangi matbuot kotibi Bekzod Qobulov faoliyati avvalida barcha jurnalist va blogerlarni ochiq muloqotga chorlab, o‘zaro fikr almashdi.

Toshkent viloyati hokimligi barcha ommaviy axborot vositalari xodimlari bilan hamkorlikda ishlashga, ularning so‘roviga hozirjavob bo‘lishga tayyorligini ma’lum qilamiz. Bizning, shaxsan mening vazifam jurnalist va blogerlarning so‘roviga o‘z vaqtida munosabat bildirish. Aslida matbuot kotibi hokimlik va jurnalistlar o‘rtasida muloqot yaratgani uchun, hokimlikka bo‘layotgan savollarga o‘z vaqtida javob bergani uchun maosh oladi, — deydi viloyat hokimligi axborot xizmati rahbari Bekzod Qobulov.

Tadbirda so‘z olgan “Daryo” jurnalisti hokimliklarda faoliyat yurituvchi matbuot kotiblarining hokimlar bilan to‘g‘ridan to‘g‘ri muloqoti yo‘qligini aytib, bu borada Toshkent viloyatida ahvol qanday ekani, Bekzod Qobulovning matbuot kotiblari faoliyatini yaxshilash borasidagi rejalari qandayligi bilan qiziqdi.

Bizda bu borada muammo yo‘q, menimcha. Barcha tuman va shahar hokimliklari matbuot kotiblari to‘g‘ridan to‘g‘ri hokimlar bilan muloqot qila oladi. Shaxsan o‘zim ham to‘g‘ridan to‘g‘ri hokim bilan gaplashaman va maslahatlashaman. Matbuot kotiblari faoliyati yaxshilash borasida ishlarimiz ko‘p. Ishim avvalida viloyat hokimi bilan muloqot qilib, nohaq ishdan bo‘shatilgan matbuot kotiblaridan birini o‘z ishiga qaytarishni, shuningdek Nurafshon shahri hokimligining matbuot xizmati faoliyatini rivojlantirish borasida takliflar berdim, — deydi u.

Bekzod Qobulov, shuningdek, “Rost24.uz” sayti jurnalisti Anora Sodiqovaning saytda e’lon qilingan maqola sabab Toshkent viloyati va tumanlarida sayt jamoasiga nisbatan dushmanqarash kayfiyat shakllanganini aytib, bunga mas’ulning munosabatini so‘radi.

Men ishim avvalida jamoamga bizni tanqid qilgan jurnalistning shaxsi qoralanishi mumkinmasligi, bizning kamchiligimizni ko‘rsatgan OAV vakiliga rahmat aytib, uni tuzatishga urinishimiz kerakligini tushuntirdim. Bundan keyin bunaqa holatlar uchramaydi. Rost24 jamoasi bilan do‘stona hamkorlikda davom etamiz, — dedi Bekzod Qobulov jurnalist savoliga javob berar ekan.