5 октябрь куни Таиланд пойтахти Бангкок шаҳридаги Ўзбекистон Бош консулхонасида Бангкок Ислом қўмитаси вице-президенти Прасоб Пусамлее, Араб университетлари битирувчилари уюшмаси (Arab Universities Alumni Association) президенти Ғази Шамсуддин билан учрашув ўтказилди, деб хабар бермоқда «Дунё» ахборот агентлиги.
Қайд этилишича, учрашувда Бош консулхона томонидан Ўзбекистоннинг зиёрат туризм, сайёҳлик, гастрономик ва қишки туризм бўйича салоҳияти ҳамда ҳунармандчилик маҳсулотларига бағишланган тақдимот намойиш этилган. Шунингдек, Самарқандда бунёд этилган «Боқий шаҳар» мажмуаси ва республикада хорижий сайёҳларга яратилган қулайликлар ҳақида батафсил маълумот берилган.
Тай томони эса Қиролликнинг мусулмон аҳолиси орасида Ўзбекистоннинг ислом қадамжоларини зиёрат қилиш, ислом муҳаддислари Имом Бухорий, Имом Термизий ва бошқа буюк алломаларнинг илмий меросини яқиндан ўрганишга катта қизиқиш мавжудлигини таъкидлаган. Икки мамлакат ўртасида ноябрь ойида авиақатновларнинг тикланиши мазкур йўналишда сайёҳлар оқимини оширишга хизмат қилиши алоҳида урғуланган.
Музокаралар якунида зиёрат туризм йўналишида таиландлик сайёҳларни республикага кенг жалб қилиш мақсадида Ўзбекистоннинг ислом тамаддуни ривожига қўшган ҳиссасини Таиланд мусулмон аҳолиси орасида фаол тарғиб этиш бўйича ҳамкорликни ривожлантириш, шунингдек, Таиланд илмий доира вакилларини Ўзбекистонга ташрифларини ташкиллаштиришга келишиб олинган.
Учрашувда Бангкок Ислом қўмитаси идораси томонидан Имом Бухорийнинг «Ал-Жоми’ ас-саҳиҳ» тўпламининг тай тилида нашр этилган нусхасини Ўзбекистонда тақдим этилиши маълум қилинган.
Маълумот ўрнида қайд этиш жоиз, Бангкок Ислом қўмитаси идораси 1945 йилда ташкил этилган бўлиб, мазкур шаҳардаги 180 дан зиёд масжидлар фаолиятини тартибга солади. Ташкилотнинг фаолият йўналишларига ёшлар масалаларини мувофиқлаштириш, жамиятдаги бирдамлик ва конфессиялараро мулоқотни такомиллаштиришга хизмат қилиш каби вазифалар ҳам киради.
Изоҳ (0)