Саудиянинг Saudi Aramco энергетика компанияси ноябрь ойида Европа бозорига етказиб бериладиган Arab Light флагмани нархини 1,8 долларга пасайтирди. Бу ҳақда Bloomberg хабар бермоқда.
ОПЕК+ нефть қазиб олишни қисқартириш ҳақидаги яқинда қабул қилган қарорига қарамай, трейдерларнинг Европа Иттифоқида Arab Light нефтининг бир баррелини 40 сентга ошиши ҳақидаги прогнозлари ўзини оқламади.
Шунга қарамай, нархлар АҚШ бозорида 0,2 долларга кўтарилди. Осиё нефть экспортчилари учун ноябрь нархи ўзгармади.
Аввалроқ Saudi Aramco Осиё минтақаси учун август ойи учун нефть нархини оширганди — Arab Light нефтининг бир баррель нархи 2,8 долларга ошган.
Шу тариқа Саудия нефтининг бир баррели Уммон ва Дубай нефти саватига қараганда 9,3 долларга қимматлаша бошлади.
5 октябрь куни ОПЕК+ қўмитаси кунлик нефть қазиб олишни 2 миллион баррелга қисқартиришга келишиб олганди.
АҚШ бу қарорни Россия манфаатларига мос деб танқид қилди, чунки ишлаб чиқаришнинг қисқариши энергия нархининг ошишига олиб келади.
Изоҳ (0)