Гулнора Каримовага тегишли бўлган «Сижжак» оромгоҳи қайта аукционга қўйилди

Давлат активларини бошқариш агентлиги (DABА) «Сижжак» дам олиш масканини такроран кимошди савдосига қўйди.

Жараён икки босқичдан иборат — аввал ариза берувчилар танланади, сўнгра тижорат таклифлари баҳоланади.

Потенциал харидорлар дам олиш зонасини ривожлантириш бўйича бизнес концепциясини тақдим этишлари керак.

Оромгоҳ Ўзбекистон Биринчи Президенти Ислом Каримовнинг тўнғич қизи Гулнора Каримовага тегишли бўлган. 2017 йилда Жиноят ишлари бўйича Тошкент вилояти суди ажрими билан мусодара этилган.

Кейинчалик мусодара қилинган ушбу ҳашаматли қароргоҳ ичидаги барча жиҳозлари билан Ўзбекистон Триатлон федерациясига вақтинчалик фойдаланишга берилган эди.

Аммо охир-оқибат ушбу дам олиш масканини оммавий савдолар орқали шаффофлик принципи асосида сотувга қўйишга қарор қилинди.

2021 йилда дам олиш маскани бир неча бор сотувга қўйилган эди, бироқ харидор топилмаган. Жорий йил баҳорида ҳам оромгоҳ аукциони бўлиб ўтди, бироқ объект яна сотилмади.

Айни пайтда Давлат активларини бошқариш агентлиги тасарруфидаги мазкур мажмуанинг умумий ер майдони 5,38 гектарни ташкил этади. Бино ва иншоотлари эса 4 040 квадрат метрдир.

Оромгоҳда меҳмонхона, бир нечта ҳовуз, амфитеатр, коттеж ва бошқа иншоотлар мавжуд.