«Газпром» қароридан сўнг газ нархи кескин тушиб кетди

Европада биржа газ нархи 21 июлдан бери илк бор минг куб метр учун 1 600 доллардан пастга тушди. Бу ҳақда «Коммерсантъ» хабар бермоқда.

Бугун, 5 октябрда «Газпром» Россия хом ашёсини Австрия орқали Италияга етказиб беришни тиклади.

Савдонинг дастлабки дақиқаларида фьючерс шартномалари ҳар минг куб метр учун 1 700 долларни ташкил этган бўлса, «Газпром»нинг эълонидан сўнг нархлар минг куб метр учун 1 590 долларгача тушиб кетди.

1 октябрь куни «Газпром» Италиянинг Эни компаниясига Австрия қонунчилигидаги муаммолар туфайли мамлакат орқали газ етказиб беришнинг иложи йўқлиги ҳақида маълум қилган.

5 октябрь куни австриялик оператор рухсатидан кейин етказиб бериш қайта тикланди. Италия газнинг 25 фоизини Россиядан олади, уруш бошланишидан олдин у мамлакатдан 40 фоиз хом ашё олган.

Август ойи охирида газ нархи турбиналар таъмирланиши муносабати билан «Газпром» томонидан «Шимолий оқим» газ қувури орқали хом ашё етказиб бериш тўхтатилиши фонида кўтарилди.