АҚШ Польшага ядро қуроли жойлаштиришни режалаштирмаяпти

АҚШ НАТОга 1997 йилдан кейин қўшилган мамлакатларга, шу жумладан, Польшага ядро қуролини жойлаштиришни режалаштирмаяпти, дея маълум қилди Давлат департаменти матбуот хизмати раҳбари Ведант Пател.

Аввалроқ Польша президенти Анжей Дуда Варшаванинг Nuclear Sharing дастурида иштирок этиши масаласи очиқ бўлиб қолаётганини айтганди. Ушбу дастур доирасида НАТОнинг Европа давлатлари Америка ядро қуролини ўз ҳудудига жойлаштиради ва ўзида сақлаб туради. «Биз Америка етакчилари билан АҚШ шундай имкониятни кўзда тутяптими, йўқми, шу ҳақда гаплашдик. Мавзу очилди», — деганди у.

«Музокаралар чоғида бу мавзу очилганидан хабаримиз йўқ. Лекин айтишим мумкинки, АҚШ 1997 йилдан кейин келиб қўшилган НАТО мамлакатлари ҳудудларига ядро қуролини жойлаштиришни режалаштирмаяпти», — деди Пател.

Польша Шимолий Атлантика альянсига 1999 йилда қўшилган.

Россия президенти Владимир Путин НАТО Россия «остоналарига» қурол жойлаштираётгани ҳақида кўп бора гапирган. У Украина НАТОга аъзо бўлган тақдирда, унинг ҳудудида НАТО базаси очилиб, шу тариқа Россия учун хавф юзага келиши мумкинлиги ҳақида огоҳлантирганди.

Россия Ташқи ишлар вазирлиги ўтган йил декабрида АҚШга узатган ўз хавфсизлиги кафолатлари ҳақидаги таклифлари орасида иккинчи томон ўз миллий хавфсизлигига таҳдид деб қабул қилиши мумкин бўлган ҳудудларга қурол-яроғ жойлаштирмасликни кўзда тутувчи бандлар бор эди. НАТО учун худди шундай ҳужжатда Москва 1997 йил ҳолатига мавжуд низомларга қўшимча равишда, альянсга аъзо мамлакатларга оғир қурол-яроғ жойлаштирмасликка чақирганди.

Москва, Вашингтон ва Брюссель ўртасидаги хавфсизлик кафолатлари бўйича музокаралар натижасида ҳеч қандай битимлар қабул қилингани йўқ.