Эрлинг Ҳоланд Чемпионлар Лигасида ўзига хос натижа қайд этди

«Манчестер Сити» ҳужумчиси Эрлинг Ҳоланд Чемпионлар Лигаси гуруҳ босқичи 3-тури «Копенгаген»га қарши учрашувда (5:0) дублни расмийлаштирди.

Норвегиялик футболчи «шаҳарликлар» сафида кетма-кет 8-ўйинда гол урди. Ушбу 8 ўйинда Эрлинг 16 бор рақиб дарвозасини ишғол қилган.

Умумий ҳисобда Ҳоланд инглиз клуби сафидаги 12-ўйинида 19-голига муаллифлик қилди.

Шунингдек, 22 ёшли футболчи ЕЧЛдаги голлари сонини 28 тага етказиб олди ва Луис Суарес (27 та гол), Ривалдо (27), Эдин Жеко (26), Садио Мане (25), Раҳим Стерлинг (25) каби футболчиларни ортда қолдирди.

Эрлинг Ҳоланд инглиз клуби сафида ЕЧЛнинг дастлабки 3 ўйинида гол урган тарихдаги 3-футболчига айланди. Ундан аввал Маруан Шамах («Арсенал») ва Ферран Торрес («Манчестер Сити») ушбу натижани қайд этган.